प्रचण्डले भन्छन्- मैले होइन, कांग्रेसले पटक-पटक विश्वासघात गर्‍यो

काठमाडौँ- प्रधानमन्त्री पुष्पकमल दाहाल प्रचण्डले प्रमुख प्रतिपक्षी दल नेपाली कांग्रेसले आफूमाथि निजी आक्षेप लगाएको बताएका छन्। आफूले नभई कांग्रेसले पटक-पटक विश्वासघात गरेको समेत उनको आरोप छ।

विश्वासको मत लिने प्रस्ताव पेस गर्दै उनले चुनाव लगत्तै कांग्रेसले विश्वासघात गरेको बताएका हुन्।

‘जुन गठबन्धनमा सामेल भएर मेरो नेतत्वको पार्टीले नेपाली कांग्रेसलाई सबभन्दा ठूलो दल बनाउन मद्दत गर्‍यो, त्यही दलसँग भएको सहमति तोड्ने खुलेआम धोका र विश्वासघातको परिणाम नेकपा एमालेकालगायतका दलहरुको समर्थनमा प्रधानमन्त्री बनेको थिएँ,’ उनले भने।

राजनीतिक घटनाक्रम र उतारचढावको बीचबाट जनतामा एक चोटी स्थापित भएको मान्यता अनुसार जानु उपयुक्त हुने ठानेर  कांग्रेससँग सहकार्य गरेको उनले स्मरण गरेका थिए।

सरकार पुनर्गठन र मन्त्रालय हेरफेर गर्न चाहे पनि गठबन्धनमा सहमति नभएको उनले बताए।

आफूले गठबन्धन परिवर्तन गर्नु सामान्य राजनीतिक प्रक्रिया मात्र भएपनि कांग्रेसले अराजनीतिक व्याख्या गरेको उनले भने। कुनै समय राजनीतिक सहमति कार्यान्वयन गर्दा कांग्रेसकै नेताले ‘राजनेता’ भनेको स्मरण गर्दै उनले भने, ‘लोकतान्त्रिक प्रक्रियाबाट समीकरण बदल्दा कसरी विश्वासघाती र धोकेबाज भएँ?’

कांग्रेसका विचार समूहको द्वन्द्वले सरकार र गठबन्धनमा परेको प्रभावबाट समते आफू आजित भएको उनले सुनाए। ‘आज मैले गठबन्धनमा गरेको परिवर्तनबाट कांग्रेसभित्र एकताको कारक बन्न पाएको खुसी छु,’ उनले अगाडि भने, ‘यो युद्धविराम भएको छ, यसलाई स्थायी बनाउनु होला। यसलाई शान्तिमा बदल्नु होला।’

संसद बैठकको लाइभ प्रसारण