बाबुराम वनभोज खाँदै थिए, प्रचण्ड र महिन्द्रले पार्टी फुटाइदिए!

पोखरा- शनिबार बिहान नेकपा माओवादी केन्द्रका महासचिव देव गुरुङ र नेपाल समाजवादी पार्टी (नेसपा)का महासचिव रमेशप्रसाद यादवबीच पार्टी एकता गर्ने सहमति भयो। यो सहमतिसँगै पूर्वप्रधानमन्त्री डा बाबुराम भट्टराईले गठबन गरेको नेसपाबाट उनै बाबुराम एक्लिएका छन्।

पार्टीका अध्यक्ष महिन्द्रराय यादव पक्षले एकतर्फी रूपमा माओवादी केन्द्रसँग पार्टी एकता गर्ने सहमति गरेको हो। यसमा बाबुराम सहमत थिएनन्/छैनन्।

शनिबार बालुवाटारबाट बाहिरएको पार्टी एकता गर्ने सहमतिपत्र सार्वजनिक हुँदा नेपाल समाजवादी पार्टीका अध्यक्ष डा. बाबुराम भट्टराई भने गोरखामा थिए। आफू पढेको स्कुल पालुङटारको अमरज्योति माविका पूर्वविद्यार्थीले आयोजना गरेको वनभोज कार्यक्रममा उनी सहभागी भइरहेका थिए। वनभोजमा नेपाल समाजवादी पार्टीकै गण्डकी प्रदेशसभा सदस्य रहेका फणीन्द्र देवकोटा पनि सहभागी थिए।

त्यही बेला नेसपा अध्यक्ष महिन्द्रराय यादव र माओवादी अध्यक्ष प्रचण्डसमेतको उपस्थितिमा नेसपा महासचिव यादव र माओवादी महाचिव गुरुङले एकता गर्ने सहमति गरेका थिए। यो खबर सार्वजनिक भएसँगै बाबुराम वनभोज कार्यक्रमस्थलबाट बाहिरिएका थिए।

सहमति घोषणा कार्यक्रममा माओवादीबाट प्रधानमन्त्रीसमेत रहेका अध्यक्ष पुष्पकमल दाहाल प्रचण्ड, वरिष्ठ उपाध्यक्ष नारायणकाजी श्रेष्ठ र नेसपाका तर्फबाट अध्यक्ष महिन्द्रराय यादव, सहअध्यक्ष गंगानारायण श्रेष्ठसहित नेता उपस्थित भएको तस्बिर सार्वजनिक भएको छ।

भट्टराईले भने प्रचण्डले राजनीतिक ठगी गरेको र उनमा नैतिकताको खडेरी परेको प्रतिक्रिया दिएका छन्।

नेसपाले आइतबार कार्यकारिणी र सोमबार केन्द्रीय समितिको बैठक बोलाएको थियो। बाबुरामले पार्टी एकताको सहमति अवैधानिक भएको तर केही व्यक्तिले पार्टी छोडेर जान सक्ने बताएका छन्।

हालै मात्र बाबुरामले निर्वाचन आयोगलाई एक पत्र लेख्दै माओवादीको चुनाव चिह्नबाट जितेका आफ्ना सांसदलाई नेसपा सांसदकै रुपमा मान्यता दिन आग्रह गरेका थिए।

बाबुरामले २०७९ को मंसिरमा भएको आमचुनावमा गोरखा–२ प्रचण्डलाई छोडेर आफू चुनाव नलडी बसेका थिए। त्यस बेला पनि पार्टी एकता गर्ने सहमति भएको थियो। माओवादीको चुनाव चिह्नबाट नेसपाका दुई प्रतिनिधि सभा सांसद, बागमतीमा नेसपाका गंगानारायण श्रेष्ठ र गण्डकीमा फणिन्द्र देवकोटा विजयी भएका थिए।

उता यादव पक्षकै नेसपाका सहअध्यक्ष गंगानारायण श्रेष्ठले आफूहरूको सिंगो पार्टी नै नेकपा (माओवादी केन्द्र)सँग एकता गर्न लागेको प्रतिक्रिया दिएका छन्।

बाबुरामले केही व्यक्तिले पार्टी छोडेर जान सक्ने तर पार्टी एकताको सहमति अवैधानिक बताइरहेका बेला श्रेष्ठले यस्तो अभिव्यक्ति दिएका हुन्। दुई पार्टीबीच एकता गर्ने सहमति चुनावअघिकै भएको उनको भनाइ छ।

फुट्यो बाबुरामको पार्टी, माओवादीसँग एकता गर्न यादव समूहले गर्‍यो सहमति