जीवन बिमासम्बन्धी जनचेतना फैलाइँदै

हुम्ला- बिमाको महत्व र उपयोगिताबारे जनचेतना फैलाउनका लागि हुम्लाका दुर्गम गाउँ बस्तीमा जीवन बिमासम्बन्धी जनचेतनामूलक कार्यक्रम सञ्चालन गरिएको छ।
सर्केगाड गाउँपालिका–४ का वास्तमी टमटाले जनचेतनामूलक कार्यक्रमबाट जीवन बिमाको महत्व, फाइदा, उपयोगिताका बारेमा जानकारी प्राप्त भएको बताए।

हालसम्म आफूलाई जीवन बिमाका बारेमा कुनै जानकारी नभएको बताउदै उनले अब बिमा गर्न प्रेरित भएको बताए। मानिसका लागि फाइदैफाइदा हुने भएको हुँदा सबैले जीवन बिमा गरेर सुरक्षित हुनुपर्ने सुझाव उनले सहभागीलाई दिए।

सो जनचेतनामूलक कार्यक्रममा गाउँपालिकाकी प्रमुख प्रशासकीय अधिकृत शान्ती लामाले बिमा गर्नैपर्ने कार्यभित्र पर्ने भएका कारण ग्रामीणस्तरका यस्ता कार्यक्रम बेला बेला सञ्चालन गरेर सेवाग्राहीलाई जानकारी गराउनु आवश्यक रहेको बताइन्।

उनले बिमाबाट मानिसको बचत, सुरक्षाका साथै लगानीको पनि सुनिश्चितता हुने भएका कारण बिमाप्रति कसैले पनि नकारात्मक धारणा बनाउन नहुने बताइन्। बिमा प्राधिकरणले हुम्ला जिल्लामा बिमासम्बन्धी अभिमुखीकरण कार्यक्रम सञ्चालन गर्ने जिम्मा सूर्यज्योति लाइफ इन्स्योरेन्स कम्पनीलाई दिएको छ। उक्त कम्पनीका अपरेसन इन्चार्ज लोग भण्डारीले बिमाको महत्व दर्साएर सबैलाई बिमा गर्ने वातावरण सिर्जना गर्न कार्यक्रम सञ्चालन गरिएको बताए।

उनले मानिसको मृत्यु, दुर्घटना वा अन्त कहिले हुन्छ त्यसको यकिन नहुने भएका कारण त्यसको जोखिन वहन गर्ने माध्यम बिमा भएकाले पनि बिमा गर्न आवश्यक रहेको बताए।

बिमा आर्थिक क्षतिविरुद्धको सुरक्षा भएको नि जानकारी गरिएको थियो। त्यसै गरी कार्यक्रममा विभिन्न जीवन बिमा योजनाका बारेमा नि छलफल गरिएको थियो।