विश्वासको मत नलिएर राजीनामा दिने मुडमा गण्डकीका मुख्यमन्त्री

काठमाडौँ- गण्डकी प्रदेशका मुख्यमन्त्री सुरेन्द्रराज पाण्डे राजीनामा दिने मुडमा छन्। विश्वासको मत लिन बहुमत नपुग्ने भएपछि उनी राजीनामाको मुडमा पुगेका हुन्।
गत फागुन २३ गते नेकपा माओवादीले सरकारलाई दिएको समर्थन फिर्ता लिएपछि उनले विश्वासको मत लिनुपर्ने संवैधानिक व्यवस्था छ।

संविधानअनुसार पाण्डेले २२ गतेसम्ममा विश्वासको मत लिइसक्नुपर्छ र प्रदेश सभा नियमावलीअनुसार आज मंगलबार दिउँसोसम्ममा विश्वासको मत लिने भए संसद सचिवालयमा सूचना पठाइसक्नुपर्छ। तर, मुख्यमन्त्री पाण्डेले संसदबाट विश्वासको मत लिँदा बहुमत आउने नदेखेपछि आज ३ बजे उपलब्ध सांसदहरुसँग छलफल गरेर राजीनामा दिन लागेका हुन्।

गण्डकीमा निर्णायक देखिएको राप्रपाले २७ गतेको आन्दोलन अघि कुनै पनि सरकारलाई समर्थन नदिने अध्यक्ष राजेन्द्र राजेन्द्र लिङ्देनले नै बताइरहेका छन्। अहिलेको समीकरण अनुसार एमाले र माओवादी मिलेरमात्र सरकार बन्ने स्थिति नहुँदा गठबन्धनलाई दबाब उत्तिकै छ। एमालेका २२ र सभामुखसहित माओवादीका ८ सांसदले मात्र ६० सदस्यीय प्रदेश सभामा बहुमत पुग्ने स्थिति छैन। त्यसका लागि राप्रपा निर्णायक देखिएको हो।

संविधानको धारा १६८ (२) बमोजिम दुई वा दुईभन्दा बढी दलहरुको समर्थनमा पनि विपक्षीको सरकार बन्न नसक्ने हुँदा ठूलो दलको हैसियतमा फेरि आफू नै मुख्यमन्त्री बन्ने रणनीति पाण्डेले बनाएका छन्।

१६८ (३) बमोजिम प्रदेश सभामा सबैभन्दा बढी सदस्यहरु भएको संसदीय दलको नेतालाई मुख्यमन्त्री नियुक्त गर्न प्रदेश प्रमुखबाट आह्वान भएसँगै ठूलो दलको नेताका हैसियतले मुख्यमन्त्री नियुक्त हुने र एक महिना भए पनि लब्याउने योजनामा रहेको उनी निकट नेताहरुले बताएका छन्।