इन्जिनमा समस्या भएको जहाजलाई ‘फोर्स ल्यान्डिङ’ गराउने तयारी

काठमाडौँ- काठमाडौँबाट दुबईका लागि उडेको फ्लाइ दुबईको जहाजको इन्जिनमा समस्या भएपछि त्रिभुवन अन्तर्राष्ट्रिय विमानस्थलमा फोर्स ल्यान्डिङको तयारी गरिएको छ। सोमबार राति ९:२१ मा काठमाडौँ विमानस्थलबाट प्रस्थान गर्नेबित्तिकै जहाजको एउटा इन्जिनमा समस्या भएको पाइलटले विमानस्थलस्थित एयर ट्राफिक कन्ट्रोलरलाई जानकारी गराएका छन्।

अहिले पाइलटले जहाजलाई सुरिक्षत अवतरणको प्रयास गरिरहेका छन्। अहिले जहाज काठमाडौं-धादिङको आकाशमा २० हजार फिटमाथि घुमिरहेको एटीसीले जानकारी दिएको छ। एउटा इञ्जिनको सहायताले उडिरहेको जहाजमा पर्याप्त तेल रहेको बताइएको छ।

जहाजको एक इन्जिन फेल भएको र एक इन्जिनको अवस्था जाँच गर्ने पाइलटले एटीसीलाई जानकारी गराएका छन्। जहाज अहिले धादिङको धार्केमाथिको आकाशमा होल्ड गरिएको छ। जहाजमा १६२ जना यात्रु रहेको बताइएको छ।

त्रिभुवन अन्तर्राष्ट्रिय विमानस्थलमा आगो निभाउन प्रयोग हुने वारुणयन्त्र तयारी अवस्थामा राखिएको छ।

यसबारे विस्तृत विवरण आउन बाँकी छ।

फ्लाइट राडारमा देखिएको विमानको यात्रा