फाइनल पुग्न नेपाल र कुवेत भिड्दै

काठमाडौं- एसीसी प्रिमियर कप सुरु हुनुअघि नेपालसँगै, युएई, ओमन र हङकङ सेमिफाइनलमा पुग्ने अपेक्षा धेरैको थियो। तर एक खेलको नतिजाले यो अवस्थामा केही फरक भयो। त्यसैले शनिबार कुवेतले नेपालसँग सेमिफाइनल खेल्ने तय भएको छ।

बिहीबार मूलपानी मैदानमा सम्पन्न खेलमा कुवेतले प्रतियोगिताको उपाधि दावेदार हङकङलाई हराएपछि कुवेत सेमीफाइनल पुगेको हो। यसअघि कमजोर आकलन गरिएको टिमले अब आफू कमजोर छैन भनेर प्रमाणित गरिरहेको छ।

शनिबार दिउँसो त्रिवि मैदानमा सुरु हुने खेलमा नेपाल सहज अवस्थामा छैन। त्यसमाथि कुवेतसँग पराजयको इतिहास पनि भएकाले नेपाल दबाबमा छ।

सन् २०१२ को एसीसी एलिट ट्रफीमा नेपालले कुवेतसँग ५० ओभरको खेलमा हार खेपेको थियो। उक्त खेलमा पहिले ब्याटिङ गरेको नेपालले चार विकेट गुमाएर २८० रन बनाएको थियो। जवाफमा कुवेतले ४६ ओभर दुई बलमा ६ विकेट गुमाएर २८५ रन बनाएपछि हार व्यहोरेको हो।

त्यो खेलमा नेपालका कप्तान पारस खड्का थिए। उनले ७७ बलमा १०६ रनको शतकीय पारी खेलेका थिए। त्यस्तै ज्ञानेन्द्र मल्लले अर्धशतक बनाएका थिए। शनिबार ज्ञानेन्द्रबाहेक उक्त खेल खेलेका कुनै खेलाडी नेपाली टिममा छैनन्।

त्यसभन्दा अघि पनि नेपालले कुवेतविरुद्ध खेलिसकेको थियो। ती खेलमा नेपालले दुई जित निकालेको छ। नेपालले सन् २०१० र २००८ को एसीसी एलिट ट्रफी कुवेतलाई हराइसकेको छ। ती खेल नेपालले विनोद दास र पारख खड्काको कप्तानीमा भएका थिए।

नेपालको टिममा सुधार हुँदै आएको छ। सबैभन्दा मुख्य कुरा त नेपालले घरेलु मैदानमा पछिल्लो १३ खेलमा हार व्यहोरेको छैन। त्यसैले पनि नेपाल जितको या लयलाई कायम राख्न चाहन्छ।

यता पछिल्ला वर्षहरुमा नेपालले लिग २ मा एसोसिएटका उत्कृष्ट टिमहरुसँग खेल्ने अवसर पाइसकेको छ। र, यसले पनि नेपाली खेलाडीको प्रदर्शन राम्रो बनाइहेको छ।

तसर्थ पछिल्लो खेलहरुमा जस्तै नेपाल आजको खेलमा पनि जितको साथ अघि बढ्न चाहन्छ। सबैभन्दा मूख्य कुरा त नेपाल यो प्रतियोगित नै जितेर एसिया कपमा भारत पाकिस्तानसँग खेल्न चाहन्छ।

यस्तो छ एसीसी प्रिमियर कपमा नेपालको यात्राः
प्रिमियर कपको समूह चरणको पहिलो खेलमा नै नेपालले मलेसियाविरुद्ध ६ विकेटको जित निकाल्यो। त्रिवि मैदानमा मलेसियाले दिएको लक्ष्य ८२ बल बाँकी रहँदै नेपालले पूरा गरेर जित निकालेको थियो।

सो खेलमा मलेसियाले नेपालले २३५ रनको लक्ष्य दिएको थियो। नेपालले भने चार विकेट मात्र गुमाएर लक्ष्य पुरा गरेको हो। त्यसको तीन दिनपछि नेपालले ओमनसँग भिड्ने तय थियो। उक्त खेलमा नेपालले ओमनलाई ८४ रनले हराएयो। ४६ ओभरको तेस्रो बलमा ९ विकेट गुमाएको ओमनका अकिब इलियास घाइते भएर ब्याटिङ गर्न नआएपछि नेपालले सहज जित निकालेको हो।

त्यो खेल नेपालको लागि कीर्तिमानी खेलसमेत रह्यो। नेपालले एक दिवसीय क्रिकेटको इतिहासमा पहिलो पटक ३१० रन बनाएको थियो। त्यही खेलमा बलर सन्दीप लामिछानेले पनि सय विकेट पूरा गरेका थिए।

कपको आफ्नो तेस्रो खेलमा नेपालले साउदी अरेबियाको सामना गर्ने तय थियो। त्यही टिमविरुद्ध नेपालले मुलपानी मैदानमा अन्तर्राष्ट्रिय खेलमा डेब्यू गर्दै थियो। निरन्तर वर्षा भएपछि खेल नै सम्भव भएन। दुवै टिमले १–१ अंक बाँडे र नेपाल ५ अंक बनाएर सेमीफाइनल पुग्यो। पाँच टिम सम्मिलित समूह ए को अन्तिम खेलमा नेपालले कतारसँग सामना गर्ने तय थियो।

त्रिवि मैदानमा भएको यो खेलमा टस हारेर पहिले ब्याटिङ गरेको नेपालले निकै सानो लक्ष्य प्रदान गरेको थियो। ४० ओभर तीन बलमै आलआउट भएको नेपालले १५७ रन मात्र बनायो। तर बलिङमा सन्दीप लामिछानेले उत्कृष्ट पारीले खेलेपछि कतारलाई ८९ रनमै रोकेर नेपालले ६८ रनको जित निकाल्यो। यससँगै सात अंक बनाएर नेपाल समूह विजेता भएको हो।

समूह ए र बीका सबै खेलमा जित निकाल्ने एकमात्र टिम नेपाल मात्र रह्यो।