वर्षाले प्रभावित भएको खेलमा नेपालले दियो २८१ रनको लक्ष्य

काठमाडौँ- त्रिवि क्रिकेट मैदानमा नेपालले पाहुना टिम कुवेतलाई २८१ रनको लक्ष्य दिएको छ। एसीसी प्रिमियर कपको सेमीफाइनल खेलनेपालले ४२ ओभरमा सीमित भएको खेलमा २८१ रनको लक्ष्य प्रस्तुत गरेको हो।

टस हारेर पहिले ब्याटिङको निम्तो पाएको नेपालले निर्धारित ४२ ओभरमा ९ विकेटको गुमाएर उक्त योगफल तयार गरेको हो। नेपालले धेरैपछि ओपनिङमा राम्रो प्रदर्शन गरेको हो।

यसअघि नेपालले लिग २ कै खेलमा पिएनजीविरुद्ध त्रिवी मैदानमा ५१ रनको ओपनिङ साझेदारी गरेयता सुरुआत राम्रो गर्न सकेको थिएन। त्यसपछि युएई, मलेसिया, ओमन र कतारविरुद्धको खेलमा नेपालले राम्रो सुरुआत दिने गरेको थिएन।

शनिबार सेमीफाइनल खेलमा नेपालका कुशल मल्ल र कप्तान रोहित पौडेलले ७७ रनको साझेदारी गरे। रोहित शतक बनाउनबाट मात्र ६ रनले चुके।

१० ओभर ५ बलमा कुशल भुर्तेल, ११.३ ओभरमा भीम सार्की र १२.२ ओभरमा आसिफ शेख आउट भएका थिए।

एड्नस इड्रेसको बलमा पटेलको हातबाट क्याचआउट हुनुअघि आसिफले ३१ रन बनाइसकेको थिए। आसिफ आउट हुँदा नेपालको खातामा ८० रन मात्र थियो। तर त्यसपछि नेपालका कप्तान रोहित पौडेल र कुशल मल्लले १०९ को शतकीय साझेदारी गरे। त्यसबीच वर्षा भएपछि दुई घण्टा खेल अवरुद्ध भएको थियो।

खेलको समय घटेपछि आठ ओभर घटाएर बाँकी खेललाई ४२ ओभरको निर्धारण गरिएको थियो। २३ ओभर दुई बलमा रोकिएको खेल १ बजे पुनः सुरु भएको थियो। खेलमा रोहित र कुशल मल्लले अर्धशतक पुरा गरे।

४२ बलमा अर्धशतक बनाएका मल्ल ५७ रन बनाएर आउट भए। उनले खलभर चार चौका र चार छक्का प्रहार गरेका थिए। कतारविरुद्ध ३ रनमै आउट भएका उनले त्यसअघिका खेलमा भने १०८ र अविजित ७० रन बनाएका थिए। उनको आजको प्रदर्शन पनि उत्कृष्ट रह्यो।

रोहितसँगै ३७ रनको साझेदारी गरेको आरिफ शेख १९ बलमा १९ रन बनाएर रन आउट भए। आरिफपछि मैदान छिरेका दिपेन्द्र सिंह ऐरी गोल्डेन डक भएर पेबेलियन फर्किए। ऐरीले पनि पछिल्ला चार खेलमा खास प्रदर्शन गर्न सकेका छैनन्। त्यसपछि उनी जारी प्रिमियर कपमा चाँडै आउट भइरहेका छन्। उनले मलेसियाविरुद्ध अविजित ५ रन बनाएका थिए भने ओमनविरुद्ध ७ र कतारविरुद्ध १२ रनमै आउट भएका थिए।

खेलको ३५ ओभरपछि नेपालको लगातार विकेट गइरह्यो। सन्दीप लामिछाने पनि पाँच रनमै बोल्ड आउट भए। यसरी नेपाल ३६ औं ओभर(पटेलले सम्हालेको)मा दुई र ३७ औं ओभरमा एक विकेट गुम्यो। तर आज १२ ओभरपछि सम्हालिएर खेलेका रोहितले पारीलाई ४१ ओभरसम्म डोहोर्‍याए।

यो खेलमा सतक बनाउन चुकेका रोहितले यसअघिका खेलमा राम्रो ब्याटिङ गरे पनि अर्धशतकमा कन्भर्ट गर्न सकेका थिएनन। तर कुवेतविरुद्ध उनले सुरुआतबाटै आक्रामक खेले। प्रिमियर कपको यसअघिको खेलमा उनले मलेसियाविरुद्ध ४२, ओमनविरुद्ध २३ र कतारविरुद्ध २७ रन बनाएका थिए। आज रोहितले ९४ बलमा सात चौका र तीन छक्काका साथ ९४ रन बनाए। शतकको नजिकै पुगेर उनी असलमको बलमा पटेलको हातबाट क्याचआउट भए।

नेपालविरुद्ध किफायती बलिङ गरेका मोहम्मद असलम र इदरेसले समान तीनतीन विकेट लिए। यासिन पटेल र सयद मोनिबले पनि समान एकएक विकेट लिएका थिए।