सन् २००० यताका विमान दुर्घटनामा ३९२ जनाको मृत्यु

काठमाडौँ- सन् २००० यता नेपालमा विमान दुर्घटनामा परी ३९२ जनाको मृत्यु भएको छ। विभिन्न मितिमा भएका यी दुर्घटनामा परी ४० जना घाइते भएका छन्।

नेपालमा सन् २००० पछि हालसम्म भएका दुर्घटनामध्ये सबैभन्दा ठूलो दुर्घटनामा गत माघ १ गते (सन् २०२३ जनवरी १५) मा पोखरामा भएको यती एयरलाइन्सको दुर्घटना हो। उक्त दुर्घटनामा परी विमानमा सवार सबै ७२ जनाको मृत्यु भएको थियो।

यस्तै सन् २०१८ मार्च १२ मा त्रिभुवन अन्तर्राष्ट्रिय विमानस्थलमा युएस-बंगला एयरलाइन्सको दुर्घटनामा परी ५१ जनाको मृत्यु भएको थियो भने २० जना घाइते भएका थिए। विमानमा ७१ जना सवार थिए।

सन् २०१३ मे १६ मा मुस्ताङमा नेपाल एयरलाइन्सको जहाज दुर्घटना परेको थियो। उक्त दुर्घटनामा ७ जना घाइते भएपनि कसैको पनि मृत्यु भएको थिएन।

000

संखुवासभामा शुक्रबार सिम्रिक एयरको हेलिकोप्टर दुर्घटनामा परी घाइते भएका चार जनालाई ललितपुरको मेडिसिटी अस्पतालमा भर्ना गरिएको छ। घाइतेमध्ये तीन जनलाई नेपाली सेनाको हेलिकोप्टरले उद्धार गरी मेडिसिटी ल्याएको हो भने एक जनालाई सिम्रिककै अर्को हेलिकोप्टरबाट उद्धार गरी मेडिसिटी ल्याइएको हो।

दुर्घटनामा परी घाइते भएका क्याप्टेन सुरेन्द्र पौडेल, कोपाइलट छिरिङ भोटे, सहयोगी मनोज थापा, विद्युत् प्राधिकरणका कर्मचारी विक्रम शंकरलाई मेडिसिटी ल्याइएको हो। उनीहरूको शरीरका विभिन्न भागमा चोट लागेको छ।

विक्रम शंकरलाई सुरुमा जिल्ला अस्पतालमा लगिएको थियो। तर त्यहाँ उपचार हुन नसकेपछि सिम्रिक एयरकै अर्को हेलिकप्टरबाट मेडिसिटी ल्याइएको हो। शुक्रबार दिउँसो भोटखोला गाउँपालिका-४ मा सिम्रुङटार हम्बरे भन्ने स्थानमा सिम्रिकको हेलिकोप्टर दुर्घटना परेको थियो। दुर्घटनामा परी भविन गुरुङको मृत्यु भएको जिल्ला प्रहरी कार्यालय संखुवासभाले जानकारी दिएको छ।

हेर्नुहोस् सन् २००० पछि भएका विमान दुर्घटनाको सूची