एनसेलको सीएसआर : सातै प्रदेशमा १८ कार्यक्रम कार्यान्वयन

काठमाडौँ- एनसेलले व्यावसायिक सामाजिक जिम्मेवारी (सीएसआर) अन्तर्गत सातै प्रदेशमा विभिन्न सामाजिक विकास सम्बन्धी विभिन्न आयोजनाहरू सञ्चालनमा रहेका छन्।

कम्पनीले गत वर्ष आफ्नो १८ औं वार्षिकोत्सवको अवसरमा ‘एटीन फर एटीन’ अर्थात १८ औं वर्षको लागि १८ वटा सामाजिक पहलहरूका लागि आवेदन खुल्ला गरेको थियो र यसै पहलअन्तर्गत विभिन्न क्षेत्रमा विकास कार्यहरू सातै प्रदेशमा कार्यन्वयन भइरहेका छन्।

देशव्यापी रुपमा समुदाय स्तरमा आवश्यक रहेको विकास कार्यका लागि आह्वान गरिएको आवदेन प्रस्तावमा एनसेलले सातै प्रदेशबाट १६५ बढी प्रस्ताव प्राप्त गरेको र ती प्रस्तावहरूको मुल्याङ्कन गरेर सीएसआरका लागि विभिन्न प्राथमिकता क्षेत्रमा १८ वटा विकास कार्यहरू छनोटगरी कार्यन्वयनमा ल्याइएका हुन्।

छानिएका परियोजनाहरूमा बागमती प्रदेशको लागि ‘प्लास्टिक वेस्ट म्यानेजमेन्ट’, डिजिटल साक्षरता कार्यक्रम तथा म्यूजियमको माध्यमबाट नेपालको कला तथा संस्कृतिको प्रवर्द्घनको कार्यक्रम तथा शिक्षासम्बन्धी कार्यक्रमहरू रहेका छन्।

गण्डकी प्रदेशमा शिक्षा क्षेत्रअन्तर्गत विभिन्न कारणले गर्दा स्कूल जान छाडेका तथा स्कुलबाट बाहिररहेका बच्चाहरुलाई पुनः स्कूल पठाउनको लागि ‘स्कूल फर आउट अफ स्कूल चिल्ड्रेन’, हुप्सेकोटमा स्वास्थ्य सम्बन्धि न्यूट्रिसन, वाससम्बन्धी कार्यक्रम तथा वातावरण संरक्षण तथा प्रवर्द्घनको लागि ग्रिन बक्स कार्यक्रम रहेका छन्।

त्यसैगरी कोशी प्रदेशको लागि ६ हजार महिलाका पाठेघरको मुखको क्यान्सरको स्क्रिनिङ तथा नेपालमा पर्वतारोहणको लागि आउने पर्यटकहरूको सुरक्षाको लागि जनसचेतना कार्यक्रमहरू रहेका छन्। लुम्बिनी प्रदेशको हकमा विभिन्न ठाउँमा हेल्थ क्याम्प र विभिन्न सामुदायिक विद्यालयहरूमा ग्रिन स्कूलको अवधारणा विकासको लागि परियोजना सञ्चालन भइरहेको छ।

मधेश प्रदेशमा युवाहरुको क्षमता विकास तथा जिविकोपार्जनको लागि सीप विकासका कार्यक्रम तथा विद्यालयमा शिक्षा सामग्रि तथा शैक्षिक विकासका कार्यक्रम रहेका छन्। सुदुर पश्चिम प्रदेशका ५ वटा मोडल स्कुलमा स्टेम एजुकेशन, बैतडीका ५६ वटा स्कुलका शिक्षकहरुको तालिम तथा विकासका आयोजना रहेका छन्।

नविकरणीय ऊर्जा प्रवर्द्घनसम्बन्धी परियोजनाहरू सञ्चालनमा रहेका छन्। कर्णाली प्रदेशमा ‘वास’ सम्बन्धी व्यापक कार्यक्रम तथा फोहरमैला वर्गिकरण तथा फोहरबाट कम्पोस्ट मलको उत्पादन सम्बन्धि कार्यक्रमहरु रहेका छन्।

आयोजनाको अवधारणा, यसले समुदायमा पार्ने प्रभाव, त्यसको दिगोपना, आयोजनालाई थप विस्तार गर्न सकिने सम्भावना, प्रस्तावित परियोजना कार्यन्वयन क्षेत्र, प्रस्ताव पेश गर्ने संस्थाको अनुभवलगायतका आधारमा सामाजिक कार्यहरू छानिएको एनसेलद्वारा जारी विज्ञप्तिमा उल्लेख छ।

सामाजिक कार्यका लागि एनसेलका प्राथमिकताका क्षेत्रहरूमा शिक्षा, स्वास्थ्य, वातावरणसहित जीविकोपार्जन सहयोग, नवीकरणीय उर्जा र कला तथा संस्कृतिसँग सम्बन्धित परियोजनाहरू रहेको उल्लेख गरिएको छ। एनसेलले कर्णालीको चन्दननाथ नगरपालिकामा २२ हजार लाभग्राही रहने स्वास्थ्यसम्बन्धी परियोजना कार्यान्वयनमा आएको जनाएको छ।