सरकारी वकिलको कार्यालयमा दुर्गा प्रसाईंको दुई घण्टा बयान

काठमाडौँ- राष्ट्रिय स्वतन्त्र पार्टी (रास्वपा)की केन्द्रीय सदस्य टीका (ज्वाला) प्रसाईंको उजुरीमा पक्राउ परेका मेडिकल व्यवसायी दुर्गा प्रसाईंसँग सरकारी वकिलले बयान लिएका छन्।

आइतबार (२०८१ असोज ६ गते) पक्राउ परेका प्रसाईंसँग काठमाडौँका सरकारी वकिलले मंगलबार दुई घण्टा बयान लिएका हुन्।

प्रसाईंले आफ्नो चरित्रहत्या गरेको भन्दै संग्रौलाले भदौ ९ गते  प्रहरीमा उजुरी दिएकी थिइन्। साइबर अपराधमा उनीमाथि अनुसन्धान गर्न प्रहरीले तीन दिनको म्याद पाएको छ।

प्रसाईंलाई पक्राउ गर्नु गैरकानुनी भएको भन्दै बन्दीप्रत्यक्षीकरण रिट लिएर छोरा निराजन सर्वोच्च अदालत पुगेका थिए। तर निराजनको माग अनुसार सर्वोच्चले दुर्गालाई थुनामुक्त गर्न आदेश दिएन। बरु प्रसाई पक्राउ पर्नुको कारण पेस गर्न आदेश जारी गरेको छ।

सर्वोच्चका न्यायाधीश प्रकाशमान सिंह राउतको इजलासले प्रधानमन्त्री तथा मन्त्रिपरिषद्‍को कार्यालय, गृह मन्त्रालय, प्रहरी प्रधान कार्यालय, प्रहरीको साइबर ब्यूरो र जिल्ला अदालत काठमाडौँसँग उनलाई पक्राउ गर्नुको कारण माग गरेको हो।

सरकारी वकिलको कार्यालयमा बयान दिन जाने क्रममा दुर्गा प्रसाइँ (सेतो टी-सर्टमा)।

प्रसाईंले आफू क्यान्सरपीडित भएको भन्दै मेडिकल रिपोर्ट पनि बुझाएर अस्पताल बस्न चाहेका थिए। त्यसपछि गरिएको मेडिकल परीक्षणमा उनको रक्तचाप बढेको देखिएपछि वीर अस्पतालमा भर्ना पनि भएका थिए। आइतबार बेलुका नै उनलाई वीर अस्पताल भर्ना गरिएको थियो। अहिले उनी डिस्चार्ज भइसकेका छन्। प्रसाईंलाई प्रहरी वृत्त सिंहदरबारमा राख्ने तयारी भइरहेको छ।

साइबर ब्युरोबाट खटिएको टोलीले भक्तपुर कमेरेटारस्थित प्रसाईंको निवासबाटै पक्राउ गरेको थियो। साइबर ब्युरोबाट पक्राउ गर्न गएका प्रहरी एक घण्टासम्म बाहिरै बसेको थियो।

प्रहरीले ढोका खोल्न आग्रह गरेपनि प्रसाईले अटेर गरेर बसेका थिए। ढोका नखोली भित्रबाट अपशब्दसमेत प्रयोग गरिएको थियो। यसपछि प्रहरी भर्‍याङ लगाएर घरको कम्पाउन्डमा प्रवेश गरी पक्राउ गरेको थियो।

असोज २ गते बुधबार काठमाडौं जिल्ला अदालतका न्यायाधीश महेन्द्र खनालको इजलासले प्रसाईंसहित तीन जनाविरूद्ध पक्राउ पुर्जी जारी गरेको थियो। प्रसाईसहित उनीसँगै रहने युट्युबरद्वय प्रकाशचन्द्र दाहाल र जीवन पाण्डेलाई पक्राउ गर्न प्रहरीले अनुमति लिएको थियो।

उनीहरूलाई विद्युतीय कारोबार ऐन अनुसार कारबाही गर्न प्रहरीले पक्राउ गर्न अनुमति लिएको हो। प्रसाईंको समर्थनमा प्रदर्शन गर्ने ५ जनालाई प्रहरीले गिरफ्तार गरेको छ।

सरकारी वकिलको कार्यालयमा बयान दिने क्रममा दुर्गा प्रसाइँ (दायाँबाट दोस्रो)।

प्रसाईंले युट्युब च्यानललाई अन्तर्वार्ता दिँदै ज्वालामाथि विभिन्न लाञ्छना लगाएका थिए। तर ती आरोपका कारण आफ्नो चरित्रहत्या भएको भन्दै संग्रौलाले उजुरी हालेकी हुन्।

त्यसको केही दिनअघि कान्तिपुरको मास्टहेड दुरुपयोग गर्दै ज्वालाविरुद्धको फेक पोस्ट भाइरल बनाइएको थियो। त्यही फेक पोस्टलाई विश्वास गर्दै प्रसाईंले संग्रौलालाई लाञ्छना लगाएका थिए।

केही समयअघि ‘जापानमा वेश्यावृत्तिमा संलग्न भनिने ज्वाला संग्रौला’ भन्ने टाइटल राखेर उनको तस्विरसहित फेक पोस्ट तयार पारिएको थियो। उक्त सामग्रीलाई ज्वालाका विरोधीले सामाजिक सञ्जालमा हाले।

तर कान्तिपुरले त्यस्तो समाचार सामग्री प्रकाशन नगरेको प्रमाणित भइसकेको छ। आफ्नो अन्तर्वार्तामा प्रसाईंले ज्वालाको नाम नलिइकन ‘जापानमा वेश्यावृत्ति गर्ने महिला’ भनी आरोप लगाएका थिए।

‘कोही जापानमा वेश्यावृत्ति गर्ने, कुनै पार्टीको केन्द्रीय सदस्य भका छन्। जापानमा वेश्यावृत्ति गर्ने, केटालाई केटी मिलाइदिने, भँडुवाको काम गर्ने, दलालको काम गर्ने, हामीलाई थाहा छैन?,’प्रसाईले भनेका थिए, ‘त्यस्ता मान्छे फेसबुक स्टाटसमा लेखेर दुर्गा प्रसाईलाई हल्लाउन खोज्छन्। वेश्या, भँडुवा, पागलले हल्लाएर दुर्गा प्रसाईं हल्लिँदैन।’

आफूले विदेशमा अप्ठेरोमा परेकाहरूलाई सहयोग गर्दा पनि ज्वालाले विरोध गरेको प्रसाईंको दुखेसो थियो। ‘मैले लास ल्याउँदा सुन ल्याएँ रे! जेलमा बसेको त्या भाइहरुलाई उतै मर्न दिनुपर्ने रछ नि! अब गर्ने कि नगर्ने! तिनीले गरुन्। त्यही जापानमा वेश्यावृत्ति गर्नेले गरुन् नि,’ संग्रौलामाथि प्रसाईंको आरोप थियो, ‘अर्कालाई केटी मिलाइदिने, अनि आफू पनि वेश्यावृत्ति गर्ने, रातभरि सात जनासँग चर्ने। त्यसले गर्नु नि! फेसबुकमा लेख्न जानें भनेर हालिछे। यस्ता छन् नयाँ पार्टीका मेम्बर। त्यसको शाखा सन्तानै त्यस्तो हो क्या! आफू केही राम्रो नगर्ने, अर्काको खोइरो खन्ने।’

महिलाको चरित्रहत्या गरेको आरोपमा प्रसाईंविरुद्ध उजुरी परेको यो नै पहिलो पटक भने होइन। यसअघि पनि उनीविरुद्ध उजुरी पर्ने गरेका थिए। २०७५ साउन १० गते पनि मानव अधिकार आयोगमा प्रसाईंविरुद्ध महिलाको चरित्रहत्या गरेको आरोपमा उजुरी दर्ता भएको थियो।

बंगलादेशमा चिकित्सा शिक्षा अध्ययन गर्ने नेपाली छात्राको मर्यादामाथि प्रश्न उठाएको र गालीगलौज गरेको भन्दै सामाजिक अभियन्ता जमुना सुवेदी, अम्बिका कार्की तथा राज्यलक्ष्मी श्रेष्ठले प्रसाईंविरुद्ध आयोगमा उजुरी दर्ता गराएका थिए।

सरकारी वकिलको कार्यालयमा बयान दिने क्रममा दुर्गा प्रसाइँ (दायाँबाट दोस्रो)।

प्रसाईंले बंगालादेशमा चिकित्सा शिक्षा अध्ययन गर्न जाने नेपाली महिलामाथि यौन दुर्व्यवहार हुने गरेको आशयको अभिव्यक्ति दिएका थिए। प्रसाईको सो अभिव्यक्तिविरुद्ध सामाजिक संजालदेखि मिडिया र देशको राजनीतिक वृत्तमा बहसको विषय बनेको थियो।

नेपाली महिलाको चरित्र हत्या गरेको भन्दै प्रसाईंलाई गाली बेइज्जती ऐन २०१६ र सार्वजनिक अपराध तथा सजाय ऐन २०२६ बमोजिम दण्ड सजाय गर्न र दुर्गा प्रसाईंलाई जेल चलान गर्नसमेत उजुरीकर्ताको माग थियो।

प्रसाईंमाथि कारबाहीको माग गर्न नेपाली कांग्रेसको भातृ संगठन नेपाल विद्यार्थी संघले राष्ट्रिय महिला आयोगमा उजुरी दिएको थियो।

‘प्रसाईंले पत्रकार सम्मेलनमै चिकित्सा शिक्षामा उच्च शिक्षा हासिल गर्न विदेश जाने छात्राहरूलाई त्यहाँका प्रोफेसरहरूले करणी गरी राख्ने’ भन्ने गलत अभिव्यक्ति दिएको भन्दै नेविसंघले कारबाही माग्दै उजुरी दिएको थियो।

महिलाहरूको अस्मितामा धावा बोल्नेलाई कारबाही गर्नुपर्ने माग गर्दै नेविसंघकी केन्द्रीय सदस्य जानुका पन्तले आयोगमा उजुरी दिएकी थिइन्।

‘महिलाको चरित्र हत्या गर्ने छुट प्रसाईंलाई कुनै कानूनले दिएको छैन,’ नेविसंघले त्यसबेला जारी गरेको विज्ञप्तिमा भनिएको छ, ‘प्रसाईंलाई कारबाही नगरी त्यसै छाड्दा उसको उद्दण्ड व्यवहारलाई थप प्रोत्साहन हुन्छ।’