बचेखुचेको सामानको जोहो गर्न थाले ललितपुरका बाढीपीडित

ललितपुर- शुक्रबारदेखिको अविरल वर्षाका कारण शनिबार काठमाडौँ उपत्यकाको बागमती नदीमा आएको बाढीले धेरै ठाउँमा ठूलो जनधनको क्षति पुर्‍यायो।

ललितपुरको टीकाभैरव भएर बग्ने नख्खुखोला छेउका बस्ती पूर्ण रूपमा डुबानमा पर्‍यो। घर, पसल र बासस्थानमा पानी पसेर यहाँको जनजीवन, व्यापार, व्यवासय अस्तव्यस्त छ। खोला किनारामा बसोबास गर्नेहरूको टहरासहित सबै सरसमान बगाएको छ।

शनिबार बेलुकीदेखि नख्खु खोलाको बहाव घटेपछि बाढीपीडितहरू बाढीबाट जोगिएका तर निथ्रुक्क भिजेका सरसमानको व्यवस्थापनमा जुटेका छन्। हाल घर, पसल तथा भवनका कोठाभित्र पसेको लेदो हटाउने काम भइरहेको छ।

मोटरसाइकल, गाडीलगायत धेरै सामग्री बगाएको कपितय बाढीपीडितको भनाइ छ। बाढीले आफ्ना ६ बङ्गुर र ७० हाँस तथा लोकल कुखुरा बगाएको ललितपुर महानगरपालिका–१८ नख्खुपुल छेउमा बस्दै आएकी रेणुका लिम्बूले बताइन्।

‘शुक्रबार राति १२ बजे कोठाभित्र पानी पसेको थियो । पानी पस्नेबित्तिकै सामान अर्को ठाउँमा सार्दै थियौँ,’ उनले भने, ‘सामान सार्दासार्दै खोला बढ्दै गएर बिहान ७ बजेसम्म सबै बगायो। हाम्रो मात्र होइन, अरूको पनि धेरै क्षति भएको छ।’

ललितपुर महानगरपालिका–१४ नख्खुडोल र ललितपुर वडा नं २५ भैँसेपाटी जोड्ने पुलमा बाढीले क्षति पुर्‍याएपछि अहिले आवतजावतमा रोक लगाइएको छ। नख्खुडोल पुल छेउमा बसोबास गर्नेको अस्थायी टहरा सबै बगाएको छ।

खोलाले डुबाएको सरसमान व्यवस्थापनका लागि आफन्तको सहायता लिएर जुटेका छन्। करिब रु १३ लाख लगानी रहेको नर्सरी र अस्थायी टहरमामा रहेको सबै सरसमान बगाएको स्थानीय रोम रानाको भनाइ छ।

‘समाचारकानुसार बाढी आउलाकि भनेर हामी सचेत त थियौँ। तर तत्काल सरसमान अर्को ठाउँमा सार्ने अवस्था भएन। जब राति कोठामा पानी पस्यो। त्यसपछि महत्वपूर्ण कागजपत्र निकाल्न भ्यायौँ, अरु सबै बाढीले बगायो,’ उनले भने, ‘अब के खाने र कहाँ बस्ने भन्ने चिन्ता छ। तत्कालका लागि त आफन्तकहाँ बसेका छौँ।’

त्यसैगरी नख्खु डोलमा पाँच वटा पसल बगाएको छ। अस्थायी टहरामा सञ्चालित पसल पूर्ण रूपमा बगाएकाले कति क्षति भएको छ भन्ने एकीन गर्न नसकिएको स्थानीय बताउँछन्।

दुःखले जोडेको सबै सामान बगाएपछि नारायण सुनुवार चिन्तित छन्। ‘म मजदुरी गरेर जीविका चलाउने मान्छे हुँ। काम गरीखाने सबै सामग्रीसमेत बगाएको छ,’ उनले दुखेसो पोखे, ‘अब कहाँ बस्ने, के खाने भन्ने चिन्ता छ । अहिलेसम्म कतैबा राहातको व्यवस्था भएको छैन। ज्यान जोगिए पनि लत्ताकपडा र अत्यावश्यक सबै समान बगाएको छ,’ उनले भने।

नख्खु खोलाले क्षति पुर्‍याएको ठाउँमा तत्काल विद्युत्, पानी र बाटोको व्यवस्थापनमा जुट्ने ललितपुर महानगरपालिका–१३ का वडाध्यक्ष गणेश केसीले बताए।

‘नख्खु खोलाले क्षति पुर्‍याएकोमा हामी निकै दुःखी छौँ। हाम्रो वडामा अवरोध भएको बाटो, विद्यत् र खानेपानी आपूर्ति व्यवस्थापनलाई पहिलो प्राथामिकता दिएर व्यवस्थापनमा लागिरहेका छौँ,’ उनले भने।