ट्रकको ठक्करले साइकलयात्रीको मृत्यु भएपछि विराटनगरमा तनाव

विराटनगर– मोरङमा बिहीबार साँझ सवारी दुर्घटना हुँदा एक जनाको ज्यान गएको छ।

विराटनगर उपमहानगरपालिका वडा नं १८ आइसीपी रोडमा ना ४ ख २४८३ नम्बरको ट्रकले साइकललाई ठक्कर दिँदा साइकलयात्री लवाघाटका ६० वर्षीय श्याम साहको ज्यान गएको थियो।

दुर्घटनामा गम्भीर घाइते भएका शाहको विराट नर्सिङ होममा चिकित्सकले चेकजाँच गर्ने क्रममा साँझ ७ः३० बजे मृत घोषणा गरेका थिए।

सवार एक जनाको मृत्यु भएपछि विराटनगर-१८ आइसीपी रोडमा तनाव सिर्जना भएको छ। सवारी चलाउने चालकलाई कारवाही र परिवारलाई क्षतिपूर्ति दिनुपर्ने भन्दै मृतकका आफन्तले आन्दोलन सुरु गरेका हुन्।

स्थानीयले भन्सार कार्यालयमा ढुंगामुढा गरेका छन्। तोडफोडको प्रयास भएपछि स्थिति नियन्त्रणमा लिन प्रहरीले १० सेल अश्रुग्यास प्रहार गरेको थियो।

ट्रक चालक सुनसरीको बर्जु गाउँपालिका ५ का ३० वर्षीय दीपक यादवलाई नियन्त्रणमा लिएको छ।

यसैबीच मृतक शाहका आफन्तजन र स्थानीय आन्दोलित भएका छन्। मृतकका परिवारलाई क्षतिपूर्ति र चालकलाई कार्वाहीको माग गर्दै उनीहरुले आन्दोलन गरेका हुन्।

आन्दोलनले सवारी आवागमनमा अवरोध भएको छ। आन्दोनलाई नियन्त्रणमा लिन प्रहरीले बल प्रयोग गरेकाे छ। भिड नियन्त्रण गर्न प्रहरीले १० सेल अश्रुग्यास प्रहार गरेको बताइएको छ।