मान्यजनबाट टीका थापेर मनाइयो दशैँ

काठमाडौँ– विश्वभरका हिन्दु नेपालीहरूले आज विजयादशमीको अवसरमा मान्यजनबाट टीका तथा जमरा ग्रहण गरेर आशिर्वाद थापेका छन्।

बिहान ११:३६को उत्तम साइत पारेर नेपालीहरूले मान्यजनको हातबाट टीका, जमरा र आशिर्वाद ग्रहण गरेका हुन्।

अब कोजाग्रत पूर्णिमाका अवसरमा अखिल बलि पूर्ति नभएसम्म मान्यजनबाट टीका ग्रहण गर्न सकिनेछ।

असत्यमाथि सत्य र आसुरीशक्तिमाथि दैवी शक्तिको विजयको प्रतीकका रुपमा मनाइने विजयादशमी बडा दशैँको सबैभन्दा महत्वपूर्ण दिन हो।

त्रेता युगमा आजैका दिन ‘भगवान् राम’ले असत्यको प्रतीक बनेका रावणमाथि विजय प्राप्त गरेकाले त्यही समयदेखि विजयादशमी मनाउन सुरु गरिएको धार्मिक विश्वास छ। यसैले आजको दिनलाई विजयको प्रतीकका रुपमा पनि लिइन्छ।

आज गुरु पुरोहित, हजुरबा, हजुरआमा, बा, आमा, मान्यजन तथा ठूलाबडाको हातबाट नव दुर्गा भवानीको टीका, जमरा तथा प्रसाद थापी उनीहरूबाट यश, ऐश्वर्य वृद्धि, काम गर्ने क्षमतामा वृद्धि एवं दीर्घायु प्राप्त होस् भनी आशीर्वाद लिइन्छ।