रायमाझी पक्राउ परेको सदनलाई जानकारी*

काठमाडौँ-  नेकपा एमालेका सांसदसमेत रहेका पूर्वउपप्रधानमन्त्री टोपबहादुर रायमाझी प्रतिनिधिसभा सदस्य पक्राउ परेको सदनलाई जानकारी गराइएको छ। सभामुख देवराज घिमिरेले सोमबार भएको प्रतिनिधिसभा बैठकमा रायमाझीलाई पक्राउ परेको जानकारी गराएका हुन्।

नेपाली नागरिकलाई नक्कली भूटानी शरणार्थी बनाएर संगठित रूपमा ठूलो रकम ठगी गरेको आरोपमा आइतबार पक्राउ परेका थिए। उनीविरुद्ध वैशाख ३१ गते पक्राउ पुर्जी जारी भएको थियो। तर आफू बिरामी भएको भन्दै फेसबुकमा स्टाटस लेखेर उनी सम्पर्कविहीन बनेका थिए। उनीमाथि अनुसन्धान गर्न प्रहरीले थप तीन दिनको समय पाएको छ।

यही प्रकरणमा हालसम्म १२ जना पक्राउ परेका छन्। रायमाझीपछि राजनीतिक ओहदामा रहेका उच्च व्यक्तित्वमा पूर्वगृहमन्त्री बालकृष्ण खाण छन्। यस्तै नेपाल सरकारका सचिव टेकनारायण पाण्डे पनि पक्राउ परेका छन्। रायमाझीबाहेकका अभियुक्तहरूमाथि अनुसन्धान गर्न प्रहरीले आइतबार ४ दिनको म्याद पाएको छ।

खाणको बयान लिनका लागि जिल्ला सरकारी वकिलको कार्यालय काठमाडौँमा सोमबार उपस्थित गराइएको छ।

(*यसअघि शीर्षकमा निलम्बित भएकोमा सच्याइएको छ। -सं‌)