बागबजारमा सुरु भयो सर्टिङसुटिङ मेला

काठमाडौँ- काठमाडौंको बागबजारस्थित आराधना कम्प्लेक्समा सुट मेला २०८१ सुरु भएको छ। नेपाल टेलरिङ व्यवसायी महासंघको आयोजनामा सुरु भएको मेला मंसिर १७ देखि २०८२ बैशाख २५ गतेसम्म चल्ने छ। नेपालमा सर्टिङ सुटिङ मेला पहिलोपटक आयोजना गरिएको आयोजकको दाबी छ।

ग्राहकलाई उच्च गुणस्तरका सर्टिङसुटिङका सक्दो धेरै विकल्प एकै ठाउँमा उपलब्ध गराउनु तथा आम सर्वसाधारणमा व्यक्तित्व निर्माणमा सहयोग गर्नु मेलाको उद्देश्य रहेको आयोजकले जनाएको छ। मेलामा सुटमा आएको नयाँ डिजाइनबारे जानकारी गराइनेछ।

विवाहको सिजनमा दूरदराजबाट सुटपाइन्ट सिलाउन काठमाडौँ आउनेलाई मेला सहयोगी हुने आयोजकको विश्वास छ।

मेलामा आराधना कम्प्लेक्समा रहेका मेरिना इम्पेक्स, अनुपम टेलर्स, श्रेष्ठ टेलरिङ, एक्सलेन्ट टेलर्स, एसटी टेलर्स, सिजनल टेलर्स, टिपटप टेलर्स, रिच स्टिचिङ, मेरो टेलर्स, हिल टप र ह्यारी कलेक्सनका स्टल रहनेछन्। यी कम्पनीहरु दशकौंदेखि गुणस्तरीय कपडाको आयात एवं सिलाइ व्यवसायमा संलग्न छन्।

‘मेलामा सहभागी व्यवसायीले मेलाका अवसरमा कपडा र सिलाइमा ग्राहकलाई आकर्षक खुट उपलब्ध गराउने हुँदा ग्राहकका लागि यो एउटा अवसर साबित हुने अपेक्षा गरेका छौँ,’ मेला संयोजक अर्जुन बस्नेतले भने, ‘मेलामा अन्तर्राष्ट्रिय जगतमै ख्याति कमाएका इटालियन, इंग्ल्यान्ड, बैंकक, भारतलगायत देशमा उत्पादित उच्च गुणस्तरको फेब्रिक विकल्प एउटै छानामुनि उपलब्ध हुने जानकारी गराउन पाउँदा हामी अत्यन्तै हर्षित छौँ।’

मेलामा सहभागी व्यवसायीले मेला अवधिमा कपडा खरीद गर्ने र सिलाउने ग्राहकमध्येबाट गोलाप्रथामार्फत भाग्यशाली विजेता चयन गरी विभिन्न स्थानको भ्रमण गराउने अफरसमेत राखेका छन्। यसबाट ग्राहकसँगको भावनात्मक सम्बन्ध अझ प्रगाढ हुने र पर्यटन प्रवर्द्धनमा समेत थोरबहुत योगदान हुने आयोजकको विश्वास छ।

आर्थिक मन्दीका कारण शिथिल भएको व्यवसायलाई गति दिनु र सटिंङसुटिङ उद्योगमा रोजगारीका अवसर सिर्जना गरी सरकारी राजस्वमा टेवा पुर्‍याउने उद्देश्यसमेत राखिएको महासंघको भनाइ छ।