समता एजुकेसनलाई नेपाल लाइफ इन्स्योरेन्सको १० लाख सहयोग

नेपाल लाइफ इन्स्योरेन्स कम्पनीले समता एजुकेसन फाउन्डेसनलाई १० लाख रुपैयाँ सहयोगस्वरुप प्रदान गरेको छ। कम्पनीले आफ्नो संस्थागत सामाजिक उत्तरदायित्व कार्यक्रमअन्तर्गत उक्त सहयोग गरिएको बताएको छ।

कम्पनीका सञ्चालक कमलेशकुमार अग्रवाल र प्रमुख कार्यकारी अधिकृत प्रवीणरमण पराजुलीले समता एजुकेसन फाउन्डेसनका अध्यक्ष दीपक सञ्जेललाई एक समारोहका उक्त रकमबराबरको चेक हस्तान्तरण गरेका हुन्।

कार्यक्रममा नेपाल लाइफ इन्स्योरेन्स कम्पनीका सञ्चालक अग्रवालले मासिक १०० रुपैयाँ शुल्क लिएर आर्थिक अवस्था कमजोर भएका बालबालिकाहरूलाई नर्सरीदेखि स्नाकोत्तर तहसम्म अङ्ग्रेजी माध्यमबाट गुणस्तरीय शिक्षा प्रदान गरिरहेको समता एजुकेसन फाउन्डेसनका संस्थापकलगायत व्यवस्थापनलाई धन्यवाद दिए। उनले शिक्षा क्षेत्रको यो अभियान राष्ट्र निर्माणमा एक कोसेढुङ्गा रहन जाने बताए।

त्यसैगरी, कम्पनीका प्रमुख कार्यकारी अधिकृत प्रवीणरमण पराजुलीले देशका कर्णधार विद्यार्थीहरूलाई गुणस्तरीय शिक्षा प्रदान गर्न सके राष्ट्रले दक्ष जनशक्ति प्राप्त गर्ने बताउँदै कम्पनीको संस्थागत सामाजिक उत्तरदायित्व कार्यक्रमअन्तर्गत समता एजुकेसन फाउन्डेसनलाई सहयोग पुर्‍याउन १० लाख प्रदान गरिएको र आगामी दिनमा पनि शिक्षाको विकास हेतु सहयोग गर्न कम्पनी तयार रहेको बताए।

त्यस्तै, समता एजुकेसन फाउन्डेसनका अध्यक्ष दीपक सञ्जेलले २३ वर्षको इतिहास बोकेको समताअन्तर्गत आजको दिनमा देशका ७७ वटै जिल्लामा करिब ३० हजार विद्यार्थीहरू अध्ययनरत रहेको जानकारी दिए।