सामान्य रुघाखोकीमै औषधि खाने प्रवृत्ति बढ्यो

काठमाडाैँ- काठमाडौंसहित देशभर अत्यधिक चिसो बढ्न थालिसकेकाले यो मौसममा रुघाखोकी लाग्दैमा औषधि किनेर नखान विज्ञहरूले सुझाव दिएका छन्।

जाडो मौसममा विशेष गरी बालबालिका तथा ज्येष्ठ नागरिकलाई बढी स्याहारको आवश्यकता पर्छ। विज्ञहरूले जाडो मौसममा बालबालिकालाई श्वासप्रश्वाससम्बन्धी, रुघाखोकी, घाँटीको सङ्क्रमण, पेट दुखाइलगायत समस्या बढी देखिने भन्दै आवश्यक सावधानी अपनाउन आग्रह गरेका हुन्।

कान्ति बाल अस्पतालका बालरोग विशेषज्ञ डा. रामहरि चापागाईँले जाडोमा विशेष गरी श्वासप्रश्वाससम्बन्धी रुघाखोकी, निमोनिया, ‘कोल्ड डाइरिया’ (चिसोले हुने झाडापखाला) का समस्या बढी देखिने बताए।

‘चिसोबाट बालबालिकालाई जोगाउन पौष्टिक आहारको जरुरत पर्छ। जुनसुकै समयमा पनि बालबालिकालाई पौष्टिक आहार आवश्यक पर्ने भए पनि जाडोमा अन्य समयमा भन्दा बढी चाहिन्छ। यसले साधारण रोग पचाउन सहयोग गर्छ,’ उनले भने। साथै, सरकारले उपलब्ध गराएका सबै खोप लगाउनुपर्ने उनको भनाइ छ।

‘खोप लगाएका बच्चालाई अरुलाई भन्दा कम रोग लाग्छ। दादुराको खोप लगाएका बच्चालाई निमोनिया हुने जोखिम कम हुन्छ,’ डा. चापागाईँले भने। जाडोमा बालबालिका चिसो मानेर नुहाउन नमान्ने, हातखुट्टा धुन गाह्रो मान्ने भएकाले पनि रोगको सङ्क्रमण बढी देखिने उनको भनाइ छ।

रुघाखोकी लाग्दैमा औषधि खानु वा खुवाउन नहुने भन्दै डा. चापागाईँले निरन्तर रुघाखोकी लागेमा विशेषज्ञ चिकित्सको परामर्श लिनुपर्नेमा जोड दिए। उनले भने, ‘सरसफाइमा ध्यान दिन सके जाडो वा गर्मीमा रोग लाग्ने सम्भावना कम रहन्छ। बच्चाहरू चिसोमा नुहाउन अल्छी मान्छन्। सरसफाइ नहुँदा छालामा रोग पनि देखिन सक्छ।’ उनले जाडोयाममा कोठा न्यानो राख्न हिटर तथा कोइला बाल्दा जहिले पनि सफा हावाको आवतजावत हुने वातावरण बनाइराख्न र झ्याल तथा ढोका ड्याम्म नलगाउन आग्रह गरे।

त्रिवि शिक्षण अस्पतालकी बाल स्वास्थ्य नर्सिङ विभागकी सहप्राध्यापक अप्सरा पाण्डेले जाडो मौसम सुरु भएसँगै अभिभावकले आफ्ना बालबालिकालाई पर्याप्त मात्रामा झोल कुरा खान, न्यानो लुगा लगाइदिन, दैनिक १५ देखि ३० मिनेट घाम ताप्न लगाउनेलायत काम गर्नुपर्ने बताइन्।

उनले भनिन्, ‘घाम ताप्दा शरीरलाई चाहिने भिटामिन डी प्राप्त हुन्छ र प्रतिरक्षा प्रणाली बलियो बनाउन सहयोग गर्छ। सङ्क्रमणको उच्च जोखिममा रहेका बालबालिकालाई स्वास्थ्यकर्मीको सल्लाह लिएर भाइरल फ्लूविरुद्धको खोपसमेत दिन सकिन्छ। श्वासप्रश्वासको सङ्क्रमण भएका व्यक्तिको सम्पर्कमा जाँदा मास्क लगाइदिनुपर्छ।’

बाल स्वास्थ्य नर्स डा. सुरक्षा सुवेदीले पनि जाडोमा बालबालिकालाई अझ बढी स्याहारको आवश्यकता पर्ने हुनाले तातो तथा झोलिलो खानेकुरामा जोड दिनुपर्ने बताइन्। उनले भनिन्, ‘बिहान र साँझ अत्यधिक चिसो हुने भएकाले बच्चालाई चिसोमा खेल्न दिनु हुँदैन। रुखाखोकी लाग्दैमा जथाभावी औषधि किनेर खुवाउनु हुँदैन। घरभित्रै उफ्रिने खालका व्यायाम गराउँदा उपयुक्त हुन्छ।’

डा. सुवेदीले बालबालिकालाई राति सुत्ने समयमा न्यानो बनाउन मोजा र टोपी अनिवार्य लगाइदिन अभिभावकलाई आग्रह गरिन्। ‘जाडोमा छाला सुक्खा भइराख्ने हुनाले ‘मोस्चराइजर’ लगाइदिनुपर्छ। हिटर बालेर मसाज गर्दा पनि धेरै बेरसम्म बाल्नु हुँदैन। छालामा असर गर्न सक्छ।’

कान्ति बाल अस्पतालका बालरोग विशेषज्ञ डा. चापागाईँले जाडोमा बालबालिकालाई रुघाखोकी बढी देखिने भएकाले अभिभावक आत्तिन नहुने बताए। उनले भने, ‘जाडोयाममा बच्चाहरूलाई गर्मीमा भन्दा बढी रुघाखोकी लाग्छ। रुघाखोकी लगाउने भाइरस जाडो मौसममा बच्चाको घाँटीमा बढी समयसम्म रहिरहन्छ। सर्न सक्ने सम्भावना पनि बढी हुन्छ।’

पौष्टिक आहार, झोलिलो खानपिन, पर्याप्त मात्रामा आराम गर्दा भाइरल रुघाखोकी पाँच–छ दिनमा हराएर जाने डा. चापागाईँले बताए। उनले रुघाखोकी लाग्दैमा औषधि जथाभावी पसलबाट औषधि किनेर खुवाउन हतार नगर्न अभिभावकलाई सुझाउनुभयो।

‘रुघाखोकी लागेमा न्यानो राख्ने, झोल खानेकुरामा ध्यान दिने र आराम गराउँदा बच्चा निको हुन्छ। रुघाखोकीसँगै सास फेर्न गाह्रो भएमा, कोखा हानेमा, धेरै ज्वरो आएमा, बच्चाले खाना कम गरेमा स्वास्थ्यकर्मीको सल्लाहअनुसार औषधि सेवन गर्नुपर्छ,’ बालरोग विशेषज्ञ डा चापागाईँले भने।

-रासस