सहकारीको रकम अपचलन गर्नेलाई कारबाही गर्नुपर्छ- मोहनविक्रम सिंह

अत्तरिया – नेपाल कम्युनिष्ट पार्टी (मसाल)का महामन्त्री मोहनविक्रम सिंहले सहकारीको रकम अपचलन गर्नेलाई कारबाही हुनुपर्ने बताएका छन्।

सो पार्टीले समसामयिक विषयमा धारणा राख्न आज धनगढीमा आयोजना गरेको पत्रकार सम्मेलनमा उनले भने, ‘सहकारी ठगीबाट लाखौँ जनता पीडित भएका छन्, थोरै पुँजी भएका जनताको थोरै–थोरै रकम सुरक्षाका लागि जम्मा गर्ने माध्यम सहकारी हो, तर यहाँ सहकारीका कारण अर्बौं रुपैयाँ अपचलन भएको छ, सत्यतथ्य छानबिन गरी कारबाही हुनुपर्छ।’

धेरै सहकारीमा रकम अपचलन भएको भन्दै यसमा संलग्न जो भए पनि छानबिन हुनुपर्ने सिंहले बताए। ‘सरकारले निष्पक्ष छानबिन गरेर दोषीलाई कारबाही गर्नुपर्छ’, उनले भने, ‘लाखौँ जनताको बिचल्ली भएको छ, उहाँहरूलाई न्याय दिनुपर्छ।’

यस्तै, उनले देशमा रोजगारीको अवसर नहुँदा बिदेसिनेको सङ्ख्या बढ्दै गएको भन्दै देशमा रोजगारीको अवसर सृजना गर्नेतर्फ सरकार उद्यत हुनुपर्ने बताए। संघीयताले देशको अर्थतन्त्र कमजोर हुँदै गएको पनि उनले बताए।