डाक्टरको तलव १ लाखबाट सुरु गरेर अढाई लाखसम्म पुर्‍याउन सुझाव

काठमाडौँ- चिकित्सकलगायतका स्वास्थ्यकर्मीको न्यूनतम तलव बढाउन अध्ययन समितिले सिफारिस गरेको छ। स्वास्थ्य क्षेत्रमा तत्काल सुधार गर्नुपर्ने विषयमा अध्ययन गर्न बनेको समितिले स्वास्थ्य तथा जनसंख्यामन्त्री प्रदीप पौडेललाई यस्तो सिफारिससिहतको प्रतिवेदन बुझाएको हो।

मन्त्रालयका अतिरिक्त सचिव डा. टंक बाराकोटीको संयोजकत्वमा गठित समितिले  डाक्टरको मासिक तलब एक लाखदेखि २ लाख ५० हजारसम्म सुनिश्चित गर्न सिफारिस गरेको छ।

एमबीबीएस र बीडीएस चिकित्सकको हकमा एक लाखदेखि १ लाख २५ हजार मासिक तलव दिनुपर्ने उसको सिफारिस छ।

एमडी/एमएस गरेका चिकित्सकको तलव एक लाख ५० हजारदेखि १ लाख ७५ हजार र डीएम/एमसीएच गरेका चिकित्सकको २ लाख २५ हजारदेखि २ लाख ५० हजारसम्म तलब हुनुपर्ने प्रतिवेदनको सिफारिस छ।

प्रत्येक तहमा सेवा अनुभवको अवधिका आधारमा भत्ता दिनसमेत सिफारिस गरिएको छ।

एमडी/एमएस गरेका चिकित्सकलाई ७५ देखि १०० र डीएमरएमसीएच गरेका चिकित्सकलाई १०० देखि १५० प्रतिशत विशेषज्ञ भत्ता प्रदान गर्न समितिको सिफारिस छ।

यी सुविधा निर्धारण गर्दा भुगोल (सुगम, दुर्गम, अति–दुर्गम) तथा सेवाअवधिका आधारमा वृद्धि हुने व्यवस्था गर्न पनि भनिएको छ।

स्वास्थ्यकर्मीको परिवारका सदस्यको उपचारका लागि कल्याणकारीको कोषको व्यवस्था गर्न सुझाव दिएको छ।