हर्क साम्पाङलाई खानेपानीमन्त्रीको व्यंग्य : ‘ड्रामा’ गरेर समस्या समाधान हुँदैन!

काठमाडौँ- खानेपानीमन्त्री प्रदीप यादवले ड्रामा गरेर धरानमा खानेपानीको समस्या समाधान नहुने बताएका छन्।

मन्त्रिपरिषद्बाट स्वीकृत खानेपानी तथा सरसफाई नियमावली, २०८१ को बारेमा जानकारी गराउन शुक्रबार मन्त्रालयमा पत्रकार सम्मेलन गर्दै मन्त्री यादवले यस्तो बताएका हुन्।

धरानका जनतालाई आफै पानी खुवाउँछु भन्दै मेयर सम्पाङले बहादुरी देखाएर खानेपानी संस्थान ध्वस्त पार्ने काम गरेको उनको आरोप छ।

धरान उपमहानगरका मेयर हर्क सम्पाङले खानेपानीका विषयमा ड्रामा गरेको भन्दै उनले ड्रामा छोडेर काम गर्नसमेत सुझाव दिए। ‘ड्रामा गर्नु अलग कुरा हो। काम गर्नु अलग कुरा हो। यो सरकारले काम गरेर देखाउनेछ,’ साम्पाङलाई प्रश्न गर्दै मन्त्री यादवले भने, ‘धराने जनतालाई आफैँ पानी खुवाउँछु भन्नु भएको थियो त उहाँले, किन गर्नुभएन?’

माघ ८ गते मेयर साम्पाङ धरानको खानेपानीको समस्याप्रति सरकारलाई ध्यानाकर्षण गराउन भन्दै रित्तो गाग्रो लिएर काठमाडौँ आएका थिए। रित्तो गाग्रो बोकेरै सिंहदरवार प्रवेश गर्ने तयारी गरेका साम्पाङको समूहले बोकेको रित्तो गाग्रो भने प्रहरीले खोसिदिएको थियो। प्रधानमन्त्रीसमेतलाई भेट्नका लागि सिंहदरवार पुगेका साम्पाङले मन्त्री यादवसँग मात्र भेटेर फर्किएका थिए।

मन्त्री यादवले धरानको जनतालाई पानी दिने दायित्व सरकारको भएकाले सहज रुपमा पानी उपलब्ध गराउन संघ सरकारले काम अघि बढाउने उल्लेख गरे।

त्यस्तै मन्त्री यादवले खानेपानीसम्बन्धी नियमावली राजपत्रमा प्रकाशित भइसकेको भन्दै अब खानेपानी तथा सरसफाई आयोजना कार्यान्वयनमा सहज हुने बताए।

साना घरेलु उपयोगका आयोजनाबाहेकका आयोजनाको सर्वेक्षण, निर्माण तथा सञ्चालनका लागि अनुमति लिनुपर्ने नयाँ व्यवस्था गरिएको जानकारी दिए।

खानेपानी तथा सरसफाइ सेवा महसुल निर्धारण आयोग गठन गर्ने व्यवस्था गरेकोमा यस नियमावलीले आयोगको काम तथा जिम्मेवारीलाई थप प्रष्ट पारेको मन्त्री यादवले बताए।

त्यस्तै दुई हजार भन्दा बढी धारा भएका खानेपानी सेवा प्रदायकले कूल महशुलको १ प्रतिशत रकम नेपाल सरकारको राजस्व खातामा जम्मा गर्नुपर्ने व्यवस्था गरिएको उनले जानकारी दिए।

त्यस्तै नियमावलीमा औधोगिक तथा व्यापारिक क्षेत्रबाट उत्सर्जित फोरहपानी सरकारले तोकेको मापदण्ड पालना हुने गरी प्रशोधन गरेर मात्रै ढल निकास प्रणालीमा जोड्नपर्ने व्यवस्था रहेको मन्त्रालयले जनाएको छ।