अहिलेका प्रधानमन्त्रीभन्दा राम्रोसँग देश चलाउन सक्ने दम छ : गगन थापा

काठमाडौं । नेपाली कांग्रेसका महामन्त्री गगनकुमार थापाले अहिलेका प्रधानमन्त्रीलेभन्दा राम्रोसँग देश चलाउन सक्ने दम आफूहरुमा भएको बताएका छन्।

मीनकुमारी राणा प्रतिष्ठानले आइतबार भक्तपुरमा आयोजना गरेको कार्यक्रममा उनले यस्तो बताएका हुन्।

प्रधानमन्त्री हुने पनि ठूलो कुरा नभएपनि नेतृत्व बदल्ने कुरा महत्वपूर्ण भएको उनको भनाइ थियो।

‘म अहिलेको प्रधानमन्त्री वा हुनेवाला प्रधानमन्त्री वा अस्ति भर्खर हुनुभएको प्रधानमन्त्री भन्दा हामी राम्रो प्रधानमन्त्री चलाउन सक्छौँ भन्ने कुरा म अहिले पनि विश्वास गर्दछु। आजको प्रधानमन्त्रीको ठाउँमा आजै बेलुका गएर हामीमध्ये कसैलाई प्रधानमन्त्री बनाउने हो भने अहिले चलाएको भन्दा राम्रो चलाउँछौँ। यति कुरा दाबाका साथ भन्न सक्छु। त्यही चलाउँछौँ भन्ने विश्वासका साथ बन्ने प्रयास पनि गरेको हो। म जिम्मा लिन्छु भनेर गएको पनि हो। ती प्रयासबाट आएका परिणामहरूलाई पनि स्विकार्नुपर्छ। यो दशक अब फेरि खेल फाल्नु हुँदैन,’ उनले भने।

संविधान संशोधनका लागि कांग्रेस र एमाले एकठाउँ उभिएको बताएका थापाले संविधानका आधारभूत विषयहरूलाई भने चलाउन नहुने बताए। थापाले संविधानका केही विषयहरूलाई संशोधनमार्फत फेरबदल गर्न सकिने भएपनि आधारभूत विषयहरूलाई चलाउन नहुने उनको भनाइ थियो।

थापाले अर्को विकल्प वा व्यवस्थाका विषयमा बहस भए अर्को दश वर्ष खेर जाने भन्दै असफलताको भारी व्यवस्थालाई बोकाउन नहुने धारणा राखे। पाँच-पाँच वर्षमा हुने निर्वाचनमा दलहरू जित्ने हार्ने स्वाभाविक प्रक्रिया भएकाले यसलाई सवैले स्वीकार गर्न सक्नुपर्ने उनको भनाइ छ।

थापाले कांग्रेसले ८४ को चुनावलाई पर्खेर बस्ने नभई अहिलेको अवसरलाई नै सदुपयोग गरेर देश र जनताको सम्मुन्नतिका लागि काम गर्नुपर्ने बताए।