मोहन वैद्य नेतृत्वबाट विद्रोह गरी बनेको श्रमिक कम्युनिष्ट पार्टी विघटन

काठमाडौं – मोहन वैद्य नेतृत्वको नेकपा क्रान्तिकारी माओवादी पार्टीलगायत विभिन्न पार्टीबाट विद्रोह गरी गत वैशाखमा घोषणा गरिएको श्रमिक कम्युनिष्ट पार्टी विघटन भएको दाबी गरिएको छ।

क्रान्तिकारी माओवादीका सचिवालय सदस्य पूर्णबहादुर सिंहको नेतृत्वमा घोषणा भएको सो पार्टीले सच्चा कम्युनिष्ट तथा श्रमजीवीको भावनाअनुसार काम गर्न नसकेको भन्दै पार्टी विघटन गरिएको दाबी राष्ट्रिय सम्मेलन आयोजक समिति सदस्य तथा अन्तराष्ट्रिय विभाग प्रमख लोकेश विश्वकर्मालगायत २५ जनाद्वारा हस्ताक्षर गरिएको एक विज्ञप्तिमा उल्लेख गरिएको छ।

उनीहरूले जनताको त्याग, समर्पण र बलिदानबाट प्राप्त उपल्बधि वास्तविक कम्युनिष्टबाहेक अरूले गर्न नसक्ने हुँदाहुँदै पनि विभिन्न आरोप लगाउँदै पार्टी बनाउने र पुरानै धन्दा चलाउने प्रवृत्ति हाबी भएको आरोप लगाएका छन्। विज्ञप्ति जारी गर्नेमा विदेश विभाग प्रमुख विश्वकर्मासहित राष्ट्रिय सम्मेलन आयोजक समिति सदस्यहरू रणबहादुर विक, भीमसेन भट्ट, रोहित खत्री, विएस पौडेल, ढुण्डिराज अधिकारी, विनोद भट्टराई, नवराज भुषाल, जितु तामाङ रहेका छन्।

त्यसैगरी, सल्लाहकार समिति संयोजक शैलेश श्रेष्ठ, शिक्षा विभाग सदस्य श्रीराम बन्जरा, युवा संगठन प्रमुख डायमण्ड सिम्खडा, नेवा काठमाडौं संयोजक उदयविर शाक्य, लेखापरीक्षण विभाग प्रमुख लक्ष्मण भुषाललगायत रहेका छन्।

‘श्रम गर्न नचाहने अनि चौतर्फी बाटा बन्द भएपछि कम्युनिष्ट पार्टीको आर्थिक रसिद बोकेर जीवन चलाउनु अमसक व्यक्ति वा संगठनको मामिला मात्र होइन, यो विचारको तहमा देखिएको गम्भीर विचलन हो,’ सो समूहले विज्ञप्तिमार्फत भनेको छन्।

कम्युनिष्ट भन्न चाहने बन्न नचाहने, क्रान्तिकारी देखिनुपर्ने तर हुनु नपर्ने जस्ता प्रवृत्तिको अन्त्य गर्न नसके जनविश्वास प्राप्त नहुने उनीहरूको जिकिर छ। श्रमजीवी वर्गको मुक्ति र वैज्ञानिक समाजवादको लक्ष्य प्राप्त गर्ने उद्देश्य बोकेको पार्टीको नेतृत्वले बैठक राख्न नसकेको आरोप लगाउँदै सो समूहले विचार एवं व्यवहारमा देखिएका तममाम असफलताका कारण पार्टी विघटनको निस्कर्षमा पुग्नुपरेको दाबी गरेको छ।

‘माओले पार्टी विघटनको प्रमुख कारण गलत विचारधारा र कार्यदिशालाई ठानेजस्तै लामो समयसम्म कार्यदिशाविहीनताको अवस्थामा रहनु पनि बीभत्स विघटन हुनुसरह नै हो,’ विज्ञप्ति भनिएको छ, ‘सही विचारधाराले मात्रै आन्दोलनको स्थायित्व र विकास सम्भव छ। जहाँ जो भेट्यो त्यही ठिक र सही भन्दै लहसिने तरिका मालेमावादको ठिकविपरीत नै हो।’

उक्त समूहले पार्टीमा जबर्जस्त हुर्काउन खोजिएको गलत प्रवृत्तिको अन्त्य र क्रान्तिकारी यात्राको सुनिश्चित गर्न पार्टी विघटनको निर्णय लिनुपरेको बताएको छ।

साथै सो पार्टीका सम्पूर्ण गतिविधिहरू आफूहरूले बन्द गरेको उनीहरूले जानकारी गराउँदै आगामी दिनमा कम्युनिष्टहरूको एकता र मोर्चाबन्दीमा जाने निर्णयसमेत उनीहरूले गरेका छन्।