धरहरा परिसरमा जान, पार्किङ गर्न र चढ्न छुट्टाछुट्टै शुल्क

काठमाडौँ-  मंसिर ९ गतेदेखि सर्वसाधारणका लागि खुला गरिएको धरहरा क्षेत्रमा जान पनि सरकारले शुल्क लिन थालेको छ। धरहरा परिसरमा जान प्रतिव्यक्ति ५० रुपैयाँ लिने गरिएको छ भने एक घण्टा कार पार्किङ गरेको २० रुपैयाँका दरले लिने गरिएको छ। यस्तै धरहरा चढ्नका लागि नेपाली नागरिकसँग दुई सय रुपैयाँ लिने गरिएको छ।

धरहरा चढ्ने विद्यार्थी, ज्येष्ठ नागरिक, बालबालिका, अपाङ्गता भएका व्यक्तिलाई ५० प्रतिशत छुट दिने गरिएको आयोजनाका कायम मुकायम निर्देशक प्रकाश अर्यालले बताए।

सार्क राष्ट्रबाट आउने पर्यटकलाई प्रतिव्यक्ति रु ५ सय र सार्कबाहेकका राष्ट्रबाट आउनेलाई प्रतिव्यक्ति रु एक हजार शुल्क तोकिएको छ।

अर्यालले विशिष्ट संरचना सञ्चालन तथा व्यवस्थापन विकास समिति (गठन) आदेश, २०८१ बमोजिम शुल्क लिई धरहरा सञ्चालनमा बताए। मङ्सिर ६ गतेको मन्त्रिपरिषद् बैठकले धरहरा खुला गर्ने र शुल्क स्वीकृत गर्ने निर्णय गरेको थियो।

उक्त स्थानमा दुईपाङ्ग्रे सवारीका लागि प्रतिघण्टा रु १० का दरले पार्किङ शुल्क लाग्छ।

धरहरा स्तम्भमा राष्ट्रिय महत्वका विज्ञापन गर्न प्रतिघण्टा रु पाँच हजार तोकिएको छ भने व्यावसायिक भिडिओ छायाङ्कनका लागि प्रतिघण्टा रु पाँच हजार र फोटोग्राफीका लागि प्रतिघण्टा रु एक हजार तोकिएको निर्देशक अर्यालले उल्लेख गरे।

मङ्सिर ९ गतेदेखि सञ्चालनमा आएको धरहरा अवलोकनका लागि यही माघ १५ गतेदेखि एक घण्टा समय बढाइएको हो।

यही माघ १४ गतेसम्म ३ः१५ बजेसम्म मात्र धरहरा चढ्न टिकट काट्ने गरिएको थियो। अहिले समय थप गरी ४ः१५ बजेसम्म टिकट काट्ने पाइने र साँझ ५ बजेसम्म चढ्न पाइने आयोजनाका कायम मुकायम निर्देशक प्रकाश अर्यालले जानकारी दिए। उनका अनुसार सञ्चालनको तीन महिना नपुग्दै प्रवेश शुल्कबापत रु एक करोड ५२ लाख राजस्व सङ्कलन भएको छ।

गत मङ्सिर ९ गतेदेखि सर्वसाधारणलाई शुल्कसहित खुला गरिएका ऐतिहासिक धरहराबाट यही माघ २४ गते बिहीबारसम्ममा टिकट बिक्रीबापत उक्त रकम सङ्कलन भएको निर्देशक अर्यालले बताए।

प्रत्येक बुधबार धरहरा बन्द रहने भन्दै अन्य दिन यहाँ आउने नागरिकको सङ्ख्या दैनिक एक हजार दुई सयको हाराहारीमा रहेको उनले जानकारी दिए।