महाधिवेशन गर्दा डा बाबुरामको पार्टीलाई २० लाख नाफा

काठमाडौँ- डा. बाबुराम भट्टराई नेतृत्वको नेपाल समाजवादी पार्टी (नयाँ शक्ति)लाई महाधिवेशन गर्दा झन्डै २० लाख नाफा भएको छ।

बिहीबार (आज) सम्पन्न पहिलो महाधिवेशनमा ३५ लाखभन्दा बढी खर्च भएको र २० नाफा भएको आर्थिक संयोजकसमेत रहेकी डा बाबुरामकी पत्नी हिसिला यमिले जानकारी दिइन्।

माघ २७ गते सुरु भएको महाधिवेशनमा प्रतिनिधिहरूबाट प्राप्त शुल्क, व्यक्ति तथा संस्थाहरूबाट पाएको सहयोग गरी जम्मा ५५ हजार ५० लाख रकम जम्मा भएको यमीको भनाइ छ। त्यसमा ३५ लाख ६९ हजारभन्दा खर्च हुँदा झन्डै २० लाख नाफा भएको उनले बताइन्।  ‘हामीले अहिले नाफामा छौँ,’ उनले भनिन्।

पैसा मात्रै नभएर जिन्सीका सहयोग आफूहरूले लिएको उनको भनाइ थियो। महाधिवेशनका लागि बुद्ध एयरले ५० बोरा चामल, नेपाल साल्ट ट्रेडिङले ५० सिलिन्डर ग्यास र भ्याली कोल्ड स्टोरले २०० केजी कुखुराको मासु दिएको थियो।

यसैगरी शुभेच्छुक भगवती कार्की र डा. भीमलाल तामाङले एक/एक हजारवटा अन्डा, दिनेश कुमार र रमेश उप्रेतीले क्रमश: ३० र २० केजी कालो दाल, शशी पौडेलले १० लिटर तोरीको तेल र पाँच लिटर घ्यू, उमेश मानन्धरले पाँच केजी चिया र ५० केजी चिनी, दुर्गा शोबले ५० थुङ्गा फूल, लक्ष्मीप्रसाद भट्टराईले १ केजी जिम्मु र एक केजी टिमुर, उद्योग व्यापार महासङ्घले काजगका कप तथा प्लेट सहयोग गरेको यमिले जानकारी दिइन्।