जनयुद्धमा तत्कालीन राज्य व्यवस्थाले हिंसा गरेको थियो- जनार्दन शर्मा

रुकुम पश्चिम – नेकपा माओवादी केन्द्रका नेता जनार्दन शर्माले जनयुद्धमा तत्कालीन राज्य व्यवस्थाले हिंसा गरेको बताएका छन्।

३० औँ जनयुद्ध दिवसको अवसरमा हिजो फागुन १ गते रुकुम पश्चिमको सानीभेरी पुगेका शर्माले त्यहाँ आयोजित कार्यक्रममा जनयुद्धका क्रममा नेपाली जनताको त्याग र बलिदानबाट निरंकुश राजतन्त्र अन्त्य गर्न सकिएको बताएका थिए ।

उनले त्यसक्रममा सहादत प्राप्त गर्ने सहिदप्रति श्रद्धाञ्जली व्यक्त गर्दै बेपत्ता र घाइतेप्रति सम्मान व्यक्त गरे । उनले जनयुद्धमा सहभागी योद्धा जनताप्रति आभारसमेत प्रकट गरे ।

उनले सर्वोच्च अदालतले जनयुद्ध शब्दप्रति प्रतिबन्ध लगाइएको प्रति असन्तुष्टि समेत सो क्रममा पोखे । उनले भने, ‘शान्तिपूर्ण तरिकाबाट हामीले प्रयत्न गरेका थियौँ । हाम्रो माग अघि सार्दा दमन गरियो । त्यो दमनको प्रतिरोध जनयुद्धमार्फत हामीले गरेका थियौँ । हिंसा जनयुद्ध थिएन। हिंसा तत्कालीन राज्य व्यवस्थाले गरेको हो ।’

उनले जनताले हिंसाका विरुद्ध जनताले आवाज बुलन्द बनाएको भन्दै जनता आवाज कहिल्यै प्रतिबन्ध हुन नसक्ने बताए । उनले अगाडि भने, ‘आज जनयुद्ध शब्दलाई प्रतिबन्ध लगाएको भनेर सन्तोष मान्नेहरूले बुझेहुन्छ जनताको आवाज बुलन्द भइरहन्छ ।’

उनले माओवादी पार्टी भ्रष्टाचारका विरुद्धमा उभिएको समेत बताए । उनले पार्टीलाई नयाँ ढंगबाट उठाउन आफूले आवाज उठाउँदै आएको र केन्द्रीय समितिबाट यसको थालनी भएको समेत बताए । कार्यक्रममा नेता सुदन किरातीले जनयुद्धको बलमा जनताले परिवर्तनको महसुस गर्न पाएको भन्दै जनयुद्ध शब्द प्रतिबन्ध हुन नसक्ने बताए ।