बर्दीमै भिडियो बनाएर सामाजिक सञ्जालमा राख्ने १२० प्रहरीमाथि कारबाही

काठमाडौँ- सशस्त्र प्रहरी बल नेपालले सङ्गठनको निर्देशनविपरीत सामाजिक सञ्जालमा सङ्गठनको पोशाक (बर्दी) लगाई विभिन्न क्रियाकलाप गरेको तस्बिर तथा भिडियो बनाई अपलोड गरेका १२० जना सशस्त्र प्रहरी कर्मचारीहरूलाई कारबाही गरेको छ।

सशस्त्र प्रहरीले ४ जना प्रहरी नायब निरीक्षक, ५ जना सहायक निरीक्षक, ६ जना वरिष्ठ हवल्दार, ३ जना हवल्दार, ९ जना सहायक हवल्दार, ९१ जना जवान र दुई जना परिचरलाई कारबाही गरेको हो। उनीहरूलाई नसिहत, बढुवा रोक्का, चेतावनी, सचेत, ध्यानाकर्षण र मौखिक सम्झाइबुझाइ गरिएको सशस्त्र प्रहरी बलका प्रवक्ता कुमार न्यौपानेले जानकारी दिए।

सङ्गठनको नियम विपरित कार्यगर्ने जुनसुकै दर्जाका सशस्त्र प्रहरी कर्मचारीलाई नियमन गर्नका लागि सामाजिक सञ्जाल अनुगमनसम्बन्धी शाखा स्थापना गरेको छ।

सशस्त्र प्रहरी प्रधान कार्यालयले सामाजिक सञ्जालमा अमर्यादित ढङ्गको तस्बिर तथा भिडियो बनाई अपलोड गर्ने २८ जना सशस्त्र प्रहरी कर्मचारीहरूमाथि विभागीय कारबाही गरी सोको विवरण यथाशीघ्र खुलाई पठाउन मातहत कार्यालयलाई निर्देशनसमेत दिएको छ।