ट्रम्पपछि ओलीलाई बालेनको आग्रह : नेपाली भएर बाच्ने आधार त दिनुस्!

काठमाडौँ- काठमाडौँ महानगरपालिकाका मेयर बालेन्द्र (बालेन) शाहले प्रधानमन्त्री केपी शर्मा ओलीसँग आफूहरूलाई नेपाली भएर बाँच्ने आधार दिन आग्रह गरेका छन्। शुक्रवार फेसबुकमा स्टाटस लेख्दै मेयर बालेनले प्रधानमन्त्री केपी शर्मा ओलीसँग यस्तो आग्रह गरेका हुन्।

‘प्यारो प्रधानमन्त्री ज्यु,अमेरिकाले भ्रष्ट (करप्ट) भनिसक्यो , इन्डियाले भिकारी भनिसक्यो, चीनले मान्छे गन्दैन। मलाई मेयर हो भनेर बिर्सिनुस्, नेपाली भएर बाच्ने आधार त दिनुस्,’ फेसबुकमा बालेनले लेखेका छन्।

बालेनले बिहीवार अमेरिकाका राष्ट्रपति डोनाल्ड ट्रम्पलाई मेन्सन गर्दै अमेरिकीहरूले आफ्नो देश पनि बनाउन नसक्ने टिप्पणी गरेका थिए। अमेरिकाका नागरिकहरूलाई ‘अल्छी’को संज्ञा दिँदै देश बनाउन नसक्ने टिप्पणी गरेका थिए।

‘धन्यवाद, तपाईँले हामीलाई हाम्रो देश तपाईँको भन्दा राम्रो रहेको महसुस गराउनुभयो,’ बालेनले ट्रम्पलाई मेन्सन गरेको पोस्टमा लेखिएको छ, ‘हामी गरिब छौँ किनभने हाम्रा मानिसहरू हाम्रो देश छोडेर जाँदैछन्। तपाईँ गरिब हुनुहुन्छ कि तपाईंका मानिसहरूले तपाईँको देश बनाउन सक्दैनन्।’

उनले डीभी लट्रीलाई ‘लालचपूर्ण दासत्व’ भनेका छन्। लालचपूर्ण दासत्व बन्द गरे नेपालका रत्न फिर्ता पाउने समेत बताएका छन्। यस अघि ट्रम्पले नेपाललाई दिँदै आएको सहायता फ्रड भएको बताएका थिए। उनले युएसएड, एमसिसि लगायतका परियोजनाको काम समेत बन्द गराएका थिए।

केही दिनअघि मात्रै अमेरिकी राष्ट्रपति डोनाल्ड ट्रम्पले नेपाललाई दिएको सहयोगलाई ‘फ्रड’को संज्ञा दिएका थिए। उनले नेपालको संघीयाको सुदृढीकरका लागि छुट्याएको २ करोड डलर र जैविक विविधता संरक्षणका लागि विनियोजन गरिएको १ करोड ९० लाख डलर रोकिएको जानकारी गराएका थिए।