ओलीको प्रश्न- स्विजरल्यान्डको बैंकमा मैले किन राख्ने पैसा?

काठमाडौँ- प्रधानमन्त्री ओलीले आफूले स्विटजरल्यान्डको बैंकमा पैसा राखेको भनेर अफवाह फैलाएको भन्दै रोष प्रकट गरेका छन्। आफूलाई स्विटजरल्यान्डमा राख्न पर्ने गरिका पैसा नचाहिने भन्दै उनले आपत्तिसमेत जनाएका हुन्।

‘म भ्रष्टाचार गर्दिनँ र गर्न दिन्नँ भन्दा मान्छेलाई पिर परेको छ, आत्तिएका छन्। झुटा अफवाह फैलाएका छन्,’ ओलीले थपे, ‘स्विजरल्यान्डको बैंकमा राखेको छ रे! के गर्न राख्ने। त्यो पैसाले जेट किनेर राखेको छु र यहाँ? के गर्ने त्यो पैसाले?’

आफ्नो खानपान पनि सामान्य भएकाले धेरै रकम नचाहिने उनको भनाइ थियो। ‘एउटा रोटी र तरकारी खान्छु, मेरो किचेन र बेडरुम खुला हुन्छ, मानिसहरू गइरहेका हुन्छन्, लुकाएको केही छैन’, प्रधानमन्त्रीले भने, ‘जेसुकै बोल्ने, अपमान र अफवाह फैलाउने हाम्रो सभ्यता त्यो होइन । त्यो सभ्यता भत्काउनु हुँदैन ।’ उनले कम्बोडियामा आफ्नो लगानी भएको भनेर फैलाइएका विषय पनि झुटा भएको उल्लेख गरेका थिए।

उनले ‘तिमी’ भनेर गर्ने गरेको सम्बोधनप्रति असन्तुष्टि जनाउँदै मर्यादित भाषा प्रयोग गर्नुपर्ने पनि बताए। ‘बाउलाई बोलाउँदा ‘ओए ड्याड कम हियर’ जस्तो होइन हाम्रो भाषा । बुबाज्यु यता आउनुहुन्छ कि! भन्नुपर्छ।’