खानेपानी महसुल बढाउने मन्त्री यादवको उद्घोष

काठमाडौँ- खानेपानीमन्त्री प्रदीप यादवले खानेपानीको महसुल बढाउने उद्घोष गरेका छन्।

बिहीबार काठमाडौँ नेपाल खानेपानी संस्थानको ३६औँ वार्षिकोत्सव समारोहलाई सम्बोधन गर्दै उनले यस्तो उद्घोष गरेका हुन्। तर कहिलेदेखि लागू हुने भन्ने विषयमा उनले कुनै कुरा खुलाएनन्।

खानेपानीको महसुल ११ वर्ष पुरानो भएको भन्दै उनले पुनःविचार गर्नुपर्ने आवश्यकता रहेको उल्लेख गरे। उनले पानीको गुणस्तर र परिमाणमा वृद्धि गर्ने, खानेपानी महसुल समयानुसार बढाउनुपर्ने उनको भनाइ थियो।

‘नेपाल खानेपानी संस्थान करिव ११ वर्ष पहिला निर्धारण भएको खानेपानी सेवा महसुल दरमै चलिरहेको छ,’ उनले भने, ‘अब नियमावली पनि आइसकेको छ। त्यसले तपाईंहरुको लागि धेरै चिज बाधाहरु हटेको छ। महशुलमा पनि पुनःविचार गर्नुपर्छ।’

महसुल बढाउनका लागि आफूले छलफल थाल्ने पनि उनको भनाइ थियो।

नेपाल खानेपानी संस्थान कोमामा रहेको भन्दै नाफामूलक कसरी बनाउने भन्नेमा गम्भीर हुन पनि उनले संस्थान नेतृत्वलाई आग्रह गरेका छन्। घाटामा रहेको संस्थानलाई नाफामा ल्याएरै छोड्ने प्रतिबद्धता जनाए।

पाइप फुटेको समस्या, फोहोर पानी आएको गुनासोहरू आम नागरिकले गर्ने गरेको भएपनि समाधान हुन एक महिना लाग्ने गरेको भन्दै तत्काल समस्या समाधान गर्न संस्थानलाई निर्देशन दिए। कल सेन्टरको स्थापना गरेर भएपनि जनताका समस्या समयमै समाधान गर्न निर्देशन दिए।

उनले सरकारले बनाएका पानीट्याङ्कीमा नेपाल सरकार खानेपानी मन्त्रालय नलेखिएकोमा उनको असन्तुष्टि थियो।

‘खानेपानी संस्थान कसरी अघि बढ्छ भन्ने चिन्ता छ। घाटामा रहेको संस्थान नाफामा कसरी आउँछ रु धेरै जसो शाखाहरू घाटामा नै छ। यो सेवाको भावनाले चलेको संस्थान भएको हुनाले र खानेपानी यस्तो महत्त्वपूर्ण कुरा हो। घाटामा रहेर पनि सञ्चालनमा राख्नुपर्छ। यसलाई मुनाफामा कसरी ल्याउने त्यसमा विचार गर्नुपर्छ। नागरिकबाट मासिक सेवा सुविधा त लिइराख्नुभएको छ। तर कसरी संस्था नोक्सानमा गयो। कसको कारणले गयो? त्यसकारणले गर्दा संस्थाप्रति इमानदार भइदिन आग्रह गर्दछु,’ उनले थपे, ‘संस्था रहे मात्रै तपाईँ हाम्रो भविष्य छ। धेरै ठाउँमा पाइप फुटेको, फोहोर पानी गएको गुनासो आइरहेको छ। कसरी निगरानी, जनताको गुनासो कसरी सुन्ने, कल सेन्टर राखेर अघि बढ्नुपर्छ तर त्यो देखिरहेको छैन। जानकारी गराउँदा पनि एक महिनासम्म कर्मचारी पुग्दैनन्। यसमा ध्यान जाओस्। नेपाल खानेपानी संस्थान ३६ औँ वार्षिकोत्सव मनाउँदाको मितिमा संस्था कोमामा छ। कोमाबाट कसरी निकाल्ने, यसमा हामी सबैको ध्यान जान जरुरी छ। १० महिनादेखि निमित्त जिएममा चलेको थियो, आज पूर्णता दिइसकेका छौँ।’