पूर्वराजाको स्वागतले सरकार सशंकित, काठमाडौँमा फेरि निषेध आदेश

काठमाडौँ– जिल्ला प्रशासन कार्यालय, काठमाडौँले सिंहदरबार, नयाँ बानेश्वरलगायत विभिन्न स्थानमा निषेधाज्ञा जारी गरेको छ।

जिप्रकाले फागुन २५ गतेदेखि लागू हुने गरी काठमाडौँको सिंहदरबार क्षेत्र, संसद् भवन रहेको नयाँबानेश्वर क्षेत्र, राष्ट्रपति कार्यालय आसपासको क्षेत्र, उपराष्ट्रपति कार्यालय वरपरको क्षेत्र र प्रधानमन्त्री निवास बालुवाटार आसपासको क्षेत्रमा निषेधाज्ञा जारी गरेको हो।

निषेधाज्ञा दुई महिनाका लागि जारी गरिएको जिल्ला प्रशासन कार्यालय काठमाडौँले जनाएको छ। ती स्थानमा पाँच जनाभन्दा बढी व्यक्ति भेला भई नारा, जुलुस, धर्ना, घेराउ, प्रदर्शनजस्ता गतिविधि गर्न नपाइने प्रशासनको भनाइ छ।

पोखराबाट काठमाडौँ फर्केका पूर्वराजा ज्ञानेन्द्र शाहलाई राष्ट्रिय प्रजातन्त्र पार्टी (राप्रपा), राप्रपा नेपाल र दुर्गा प्रसाईंको अभियानले त्रिभुवन अन्तर्राष्ट्रिय विमानस्थल नजिकमै भव्य स्वागत गर्दै नाराजुलुसहित शीतल निवास पुर्याइएको थियो।

स्वागतसँगै सडक प्रदर्शनमा उत्रिएका राजावादीले ‘राजा आऊ, देश बचाऊ, हाम्रो राजा हाम्रो देश प्राणभन्दा प्यारो छ, नेपाली जनता के भन्छ ? राजतन्त्र ले भन्छ ?’लगायतका नारा लगाएका थिए।

पूर्वराजालाई स्वागत गर्न तीनकुनेदेखि निर्मल निवाससम्म लाइनबद्ध राजावादीको भीड थियो। भीड नियन्त्रण गर्न प्रहरीलाई हम्मेहम्मे परेको थियो। करिब २ हजार ५ सयको संख्यामा नेपाल प्रहरी र सशस्त्र प्रहरी बल परिचालित भएका थिए। गौशालादेखि निर्मल निवाससम्मको भीडका कारण राजधानीको यातायात अस्तव्यस्त बनेको थियो।

आइतबारको स्वागत जुलुसमा अनिल बस्नेत नेतृत्वको शिव सेना नेपाल, प्रसाईं समर्थित नागरिक प्रतिरक्षा बल (पीडीएफ), राष्ट्र शक्ति नेपाल, नेवाः एकता तथा नागरिक समाजलगायत पनि पूर्वराजा शाहको स्वागतमा सडकमा उत्रिएका थिए।

पूर्वराजा ज्ञानेन्द्र आइतबार दिउँसो ३ बजेर ५२ मिनेटमा समिट एयरको विमानबाट त्रिभुवन विमानस्थलमा ओर्लेलगत्तै केहीबेर अतिविशिष्ट कक्षमा बसेका थिए।

पोखरा विमानस्थलबाट निजी सचिव र पीएसओ मात्र लिएर काठमाडौँ ओर्लिएका उनी करिब साढे ४ बजेतिर सवारीसाधनबाट उठेर समर्थकलाई अभिवादन गर्न हात हल्लाउँदै निर्मल निवासतिर अघि बढेका थिए। ज्ञानेन्द्र साँझ करिब ६ बजे निर्मल निवास पुगेका थिए।

पूर्वराजा ज्ञानेन्द्रलाई स्वागत गर्न त्रिभुवन विमानस्थल पुगेका राप्रपाका अध्यक्ष राजेन्द्र लिङदेन र राप्रपा नेपालका अध्यक्ष कमल थापाले विमानस्थलको अति विशिष्ट कक्षमा पूर्वराजा ज्ञानेन्द्रसँग भेट गरेका थिए। ती दुई नेताले पूर्वराजालाई स्वागतको तयारी र जुलुसको बारेमा जानकारी गराएका थिए।

पूर्वराजा ज्ञानेन्द्र फेरि राजनीतिमा सक्रिय हुने र आन्दोलनका कार्यक्रम बढाउन सक्ने आशंकाले सरकारले निषेधित क्षेत्र तोकेको विश्लेषण भइरहेको छ।

पूर्वराजा ज्ञानेन्द्रको पक्षमा आइतबार देखिएको समर्थनले उनका समर्थकहरू उत्साहित बनेका छन्। पूर्वराजाले प्रजातन्त्र दिवसका अवसरमा गरेको सम्बोधनमा देश बचाउनका लागि आफूलाई साथ दिन नेपाली जनतासँग आग्रह गरेपछि समर्थकको बल बढेको हो।