बार निर्वाचन : काठमाडौँ केन्द्रमा ५० प्रतिशत मत खस्यो

काठमाडौँ- नेपाल बार एशोसिएसनको नयाँ नेतृत्व चयनका लागि भइरहेको मतदानअन्तर्गत काठमाडौँ मतदान केन्द्रमा हालसम्म ५० प्रतिशतभन्दा बढी मत खसेको छ।

बार निर्वाचन समितिका निर्वाचन अधिकृत वरिष्ठ अधिवक्ता ताराबहादुर सिटौलाका अनुसार दिउँसो दुई बजेसम्ममा ३२ सय मत खसेको छ।

काठमाडौँ मतदान केन्द्रबाट मतदान गर्ने कानुन व्यवसायीको संख्या ६ हजार १ सय छ।

बार निर्वाचनमा देशभरबाट ९ हजार ९९६ जना मतदाता छन्।

शनिवार बिहान ८ बजेदेखि मतदान सुरू भएको मतदान दिउँसो ४ बजेसम्म चल्नेछ। मतदान गर्नका लागि कानुन व्यवसायीहरू बिहानैदेखि लाइनमा बसेर पालो कुरिरहेका छन्।

भावी अध्यक्षका लागि बृहत लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्राडा विजयप्रसाद मिश्र र वरिष्ठ अधिवक्ता रमणकुमार श्रेष्ठबीच मुख्य प्रतिस्पर्धा हुने आकलन गरिएको छ। बारको भावी अध्यक्षका लागि ५ जनाको उम्मेदवारी छ।

नेपाल बार एशोसिएशनको २७औँ केन्द्रीय कार्यसमितिको निर्वाचनमा २५ पदका लागि ७५ जना उम्मेदवार छन्। काठमाडौँ उपत्यका र उपत्यका बाहिर गरी जम्मा ३६ वटा मतदान केन्द्र रहेका छन्।

दिउँसो ४ बजे मतदान सम्पन्न भएपछि देशभरका मतदान केन्द्रबाट मतपेटिका संकलन गरी काठमाडौँ ल्याइनेछ। उपत्यकाबाहिरको मत गनिसकेपछि काठमाडौँको मत गणना सुरु हुनेछ।