मुकुल ढकालको दाबी : रवि दाइ रास्वपाको साधारण सदस्यबाट पनि स्वत: निलम्बित भए

काडमाडौँ- राष्ट्रिय स्वतन्त्र पार्टीका संस्थापक महामन्त्री डा मुकुल ढकालले पार्टीका सभापति रवि लामिछाने साधारण सदस्यबाट पनि निलम्बन भएको उल्लेख गरेका छन्। आफू संस्थापक महामन्त्री भएको र आफूले नै विधान बनाएको दाबी गर्दै आएका संस्थापक महामन्त्री ढकालले यस्तो जिकिर गरेका हुन्।

‘विधानत: रवि दाइ राष्ट्रिय स्वतन्त्र पार्टीको साधरण सदस्यबाट पनि स्वत: निलम्बित भएका छन्,’ उनले एक्स लेखेका छन्।

रवि लामिछानेलाई तुलसीपुर उच्च अदालतको बुटवल इजलासले थुनामा पठाउने आदेश गरेको थियो। सहकारी ठगी प्रकरणमा लामिछानेलाई रुपन्देही जिल्ला अदालतले एक करोड रुपैयाँ धरौटी लिएर रिहा गर्न आदेश दिएको थियो। उक्त धरौटी रकम बढी भएको दाबी गर्दै आफूलाई साधारण तारेखमा रिहा गर्न माग गर्दै रवि बुटवल इजलास पुगेका थिए।

के छ रास्वपा विधानमा?
रास्वपा विधानको धारा १३ मा पार्टी सदस्यको योग्यतासम्बन्धी व्यवस्था छ। उक्त धाराको उपधारा (घ)मा सम्पत्ति शुद्धीकरणको अभियोगमा सजाय पाएको हुन नहुने उल्लेख छ। धारा १४ मा पद सदस्यता समाप्ती हुने व्यवस्था गरिएको छ भने धारा ५१ मा पद रिक्त हुने व्यवस्था छ।

सभापति लामिछानेमाथि पनि सम्पत्ति शुद्धीकरणको आरोप लागेको छ। विधानको यही व्यवस्थालाई लक्षित गर्दै संस्थापक महामन्त्री ढकालले सभापति लामिछानेको सधारण सदस्यता पनि निलम्बनमा परेको जिकिर गरेका हुन्।

हेर्नुहोस् विधानका यी धाराहरू