बार निर्वाचन : ४ केन्द्रको गणना सकिँदा मिश्रले बढाए मतान्तर

काठमाडौँ- कानुन व्यवसायीहरुको छाता संगठन नेपाल बार एसोसिएसनको नयाँ नेतृत्वका लागि भएको निर्वाचनअन्तर्गत ४ वटा मतदान केन्द्रको मतगणना सम्पन्न भएको छ।

सोमवार जारी मतगणनामा ४ वटा केन्द्रको मत गनिसकिएको छ। झापा, इलाम, धनकुटा र उदयपुर मतदान केन्द्रको गणना सकिएको बार निर्वाचन समितिका निर्वाचन अधिकृत वरिष्ठ अधिवक्ता ताराबहादुर सिटौलाले जानकारी दिए।

यी चार केन्द्रको गणना गर्दा बृहत लोकतान्त्रिक, प्रगतिशील, पेशागत, राष्ट्रवादी एवं समावेशी कानुन व्यवसायी समूहबाट अध्यक्षका उम्मेदवार वरिष्ठ अधिवक्ता प्राडा विजयप्रसाद मिश्रले मतान्तर फराकिलो बनाएका छन्।

सिटौलाका अनुसार मिश्रले १८४ मत ल्याएर अग्रता बनाउँदा उनका निकटतम प्रतिस्पर्धी बनेका वरिष्ठ अधिवक्ता रमणकुमार श्रेष्ठले ११४ मत पाएका छन्।

झापा केन्द्रमा मिश्रका पक्षमा ९६ मत खस्दा श्रेष्ठले ३६ मत पाए।

इलाम केन्द्रमा मिश्रले ३७ मत पाउँदा श्रेष्ठलाई २३ जनाले मत दिएका छन्।

धनकुटा केन्द्रबाट मिश्रलाई २७ मत आएको छ भने श्रेष्ठलाई २८ मत आएको छ।

उदयपुर केन्द्रमा मिश्रले २४ मत पाउँदा श्रेष्ठले २७ मत पाए।

अहिले मोरङ जिल्ला, विराटनगर उच्च, राजविराज र सुनसरी केन्द्रको गणना जारी छ। अन्य केन्द्रको मतपेटिका खुल्न बाँकी छ।

शनिबार देशभरका ३६ मतदान केन्द्रमा मतदान भएको थियो। काठमाडौँबाहिर ३५ वटा मतदान केन्द्र थिए। काठमाडौँ उपत्यकाको मतदान केन्द्रमा मात्र ६ हजार १०२ मतदाता थिए। उपत्यकामा ४ हजार ६४३ मत खसेको छ। ९ हजार ९९७ मतदाता रहेको बार निर्वाचनमा ८० प्रतिशत मत खसेको थियो।

अध्यक्षका उम्मेदवार मिश्रलाई डीएलए, एमाले निकट पीपीएलए र राप्रपा निकट एनडीएलएको समर्थन छ। माओवादी केन्द्र निकट आरपीएलए र रास्वपाका निकटका कानुन व्यवसायीको गठबन्धनबाट वरिष्ठ अधिवक्ता रमण श्रेष्ठ अध्यक्ष उम्मेदवार हुन्।