बार निर्वाचन : कहिले सकिन्छ मतगणना?

काठमाडौँ- कानुन व्यवसायीहरूको छाता संगठन नेपाल बार एसोसिएसन (नेबाए) निर्वाचनको मतगणना जारी छ। शनिबार सम्पन्न निर्वाचनको मतगणना सोमबारदेखि सुरु गणना कहिले सकिन्छ भनेर कानुन व्यवसायीहरुले चासो व्यक्त गर्न थालेका छन्।

शनिबार देशभरका ३६ मतदान केन्द्रमा मतदान भएको थियो। आइतबार देशभरका मतदान केन्द्रबाट मतपेटिका संकलन गरी काठमाडौँ ल्याइएको थियो। निर्वाचनमा हालसम्म ३४ मतदान केन्द्रको मतगणनाको नतिजा आइसकेको छ।

नेपाल बार एसोसिएसनको निर्वाचन समितिका निर्वाचन अधिकृत वरिष्ठ अधिवक्ता ताराबहादुर सिटौलाका अनुसार हालसम्म लगभग ३५ सय मत गणना भएको छ। बार निर्वाचनमा ७ हजार ९९५ मतदान भएको थियो।

‘हामीले नेपालगञ्जबाहेक काठमाडौँ उपत्यकाबाहिरका सबै केन्द्रको गणना सकेका छौँ,’ सिटौलाले भने, ‘नेपालगञ्जको गणना जारी छ। सर्वोच्च बार, केन्द्र परिवर्तन, भक्तपुर बारलगायतका स्थानको गणना पनि जारी छ।’

निर्वाचन समितिले आज काठमाडौँ जिल्ला बार र पाटन उच्च अदालत बार बाहेकका स्थानको गणना सपन्न गर्ने योजना बनाएको छ। ‘निर्वाचन समितिले गणना छिटो सक्ने गरी काम अघि बढाएको छ। बिहीबार अन्तिम परिणाम सार्वजनिक गर्ने गरी काम अघि बढाएका छौँ,’ सिटौलाले भने। काठमाडौँ जिल्ला बारमा १९७४ र पाटन उच्च बारमा २ हजार १०६ मतदाता छन्। यी दुई स्थानबाट मात्र झन्डै ४ हजार मत खसेको अनुमान गरिएको छ।

नेपालगञ्ज र काठमाडौँ केन्द्रबाहेकको गणना सम्पन्न हुँदा वरिष्ठ अधिवक्ता प्राडा विजयप्रसाद मिश्रले २ हजार १० मत पाएर अग्रता बनाएका छन्। उनका निटकतम प्रतिस्पर्धी बनेका वरिष्ठ अधिवक्ता रमण श्रेष्ठले १ हजार ७ मत पाएका छन्।

२५ पदका लागि ७५ जना उम्मेदवार खडा भएको निर्वाचनको मतगणनाको प्रारम्भिक रुझानमा मिश्र प्यानलले फराकिलो अग्रता बनाइरहेको छ।