बारको कार्यसमिति र प्रधानन्यायाधीशबीच भेट, यी विषयमा भयो कुराकानी

काठमाडौं- नेपाल बार एसोसिएसन (नेबाए) को नवनिर्वाचित केन्द्रीय कार्यसमितिले सर्वोच्च अदालतका सम्माननीय प्रधानन्यायाधीश प्रकाशमान सिंह राउतसँग भेट गरेको छ।

शनिवार पदभार ग्रहण गरेको नवनिर्वाचित कार्यसमितिले आइतवार प्रधानन्यायाधीशसँग भेटवार्ता गरेको हो। बारका अध्यक्ष वरिष्ठ अधिवक्ता प्राडा विजयप्रसाद मिश्रको नेतृत्वमा गएको टोलीले न्याय प्रणालीसँग सम्बन्धित महत्त्वपूर्ण विषयहरूमा प्रधानन्यायाधीशको ध्यानाकर्षण गराएको थियो।

भेटका क्रममा अध्यक्ष मिश्रले न्याय परिषद् नियमावली २०७४ को नियम ११ मा गरिएको संशोधन तत्काल खारेज गर्नुपर्ने र त्यसपछि मात्र न्यायाधीशहरूको नियुक्ति गर्नुपर्ने माग राखेका थिए। यसका साथै नेबाएका निवर्तमान अध्यक्ष वरिष्ठ अधिवक्ता गोपालकृष्ण घिमिरेविरुद्धको अपहेलनासम्बन्धी मुद्दालाई प्राथमिकताका साथ छिटो सुनुवाइ गर्न आग्रह गरेका थिए।

यस्तै, मुद्दा दर्तामा देखिएको कठिनाइ, इजलास समक्ष वरिष्ठ अधिवक्ताले सहयोगी अधिवक्तासहित उपस्थित हुनुपर्ने आवश्यकता, दोहोऱ्याइ पेस गरिएका निवेदनहरूको सुनुवाइलाई गम्भीर रूपमा लिनुपर्ने, जिल्ला अदालतहरूमा म्यादबारे प्रभावकारी सुनुवाइ नहुनु, तथा जमानतका प्रक्रिया र आदेशमा एकरूपता नहुनुजस्ता विषयहरू पनि उठाइएका थिए।

‘वरिष्ठ अधिवक्ताले अनिवार्य रुपमा इजलास समक्ष सहयोगी अधिवक्ता लिई उपस्थित हुनुपर्ने, मुद्दा दर्तामा हुने कठिनाई तत्कान समाधान गर्नुपर्नेलगायतका विषयहरूमा सम्माननीय प्रधानन्यायाधीशको ध्यानाकर्षण’ गराइएको बारको विज्ञप्तिमा उल्लेख छ।

जवाफमा सम्माननीय प्रधानन्यायाधीश राउतले संवैधानिक दायराभित्र रही न्यायपालिका सुधारको लागि आफू जुनसुकै कदम चाल्न तयार रहेको बताएका थिए। नेबाएको जायज माग र गुनासा सम्बोधन गर्न आफू सदैव तत्पर रहेको उनको भनाइ थियो। साथै, नेपाल बार एशोसिएसनका जायज माग तथा गुनासाहरूलाई समाधान गर्न सधैं तत्पर रहेको र आगामी दिनमा बार-बेन्च समन्वय समितिमार्फत सहमतिका आधारमा समस्याहरू समाधान गरिने जानकारी दिए। भेटको क्रममा निवर्तमान अध्यक्षविरुद्धको अपहेलनासम्बन्धी मुद्दा पनि प्राथमिकताका साथ सुनुवाइ गरिने उनले स्पष्ट पारे।