नवनियुक्त शिक्षामन्त्री पन्तले लिए शपथ

काठमाडौँ- नवनियुक्त शिक्षामन्त्री रजुजी पन्तले पद तथा गोपनीयताको शपथ लिएका छन्।

बिहीबार राष्ट्रपति भवन शीतल निवासमा राष्ट्रपति रामचन्द्र पौडेलले उनलाई शपथ दिलाएका हुन्।

प्रधानमन्त्री केपी शर्मा ओलीको सिफारिसमा पन्त बुधवार मन्त्री नियुक्त भएका थिए।

गत ८ वैशाखमा विद्या भट्टराईले मन्त्री पदबाट राजीनामा दिएपछि शिक्षा मन्त्रालयको बागडोर सम्हाल्ने जिम्मेवारी पन्तको काँधमा आएको हो।

२०३२ सालदेखि पत्रकारिता सुरू गरेका पन्तले बुधबार साप्ताहिक, छलफल साप्ताहिक, नवयुग मासिक, युगधारा (रातो)मा काम गरेका थिए।

२०५१ सालमा तत्कालीन प्रधानमन्त्री मनमोहन अधिकारीका प्रेस सल्लाहकार बनेका पन्त त्यसपछि राजनीतिमा होमिए। २०५४ सालको नेपालगञ्ज महाधिवेशनबाट एमाले केन्द्रीय सदस्य उनी २०५६ सालमा ललितपुर क्षेत्र नम्बर ३ बाट प्रतिनिधि सभा सदस्य निर्वाचित भएका थिए।

एमालेमा उनले केन्द्रीय संस्कृति, जल तथा ऊर्जा विभाग प्रमुख भएर पनि काम गरे। एमालेको सातौं महाधिवेशन २०५९ सालमा पनि उनी केन्द्रीय सदस्य बने उनी २०६१ सालमा श्रम तथा यातायातमन्त्री बनेका थिए।

२०६३ को पुनर्स्थापित संसदमा सांसद बनेका उनी पार्टीको कानुन, सामाजिक सेवा, प्रचार विभाग हुँदै हाल संस्कृति विभाग प्रमुख छन्।

२०७९ मा पन्त समानुपातिक तर्फबाट प्रतिनिधि सभा सदस्य बनेका हुन्।