सरकारले दमनको नीति लिएपछि आन्दोलनमा थपिए शिक्षक

काठमाडौँ- आन्दोलनमा रहेका शिक्षकहरूका माग बेवास्ता गरी सरकारले दमन गर्ने नीति लिएपछि शिक्षकहरूले आन्दोलन थप सशक्त बनाएका छन्। आइतवार शिक्षक-प्रहरी झडप भएपछि सोमवारको आन्दोलनमा शिक्षकहरू थप भएका हुन्।

आइतवारको झडपमा ६२ शिक्षक र एक जना पत्रकार घाइते भएका थिए। तर सरकारले भने शिक्षकका मागमा थप कुनै प्रक्रिया अघि बढाएको छैन।

आफूहरूसँग गरिएको सम्झौताअनुसार विद्यालय शिक्षा ऐन जारी गर्नुपर्ने मागसहित उनीहरू चैत २० गतेयता शिक्षकले काठमाडौँकेन्द्रित सडक आन्दोलन गर्दै आएका छन्।

आन्दोलनमा सहभागी शिक्षकहरू आइतवारको भन्दा पनि थप भएको नेपाल शिक्षक महासंघका अध्यक्ष लक्ष्मीकिशोर सुवेदीले बताए। राजधानी नजिकमा जिल्लाहरूबाट सोमवारको आन्दोलनका लागि शिक्षकहरू राजधानी आएका थिए।

प्रहरीको दमनपछि नेपाल शिक्षक महासङ्घले काठमाडौँ केन्द्रित आन्दोलनमा घरमै बसेका शिक्षकहरूलाई तत्काल आउन आह्वान गरेको थियो। सोही आधारमा आज धेरै शिक्षकहरू थपिएको सुवेदीको भनाइ छ।

‘सोमवारको आन्दोलन शान्तिपूर्ण थियो। आइतवार प्रहरीले दमन गरेपछि देशभरका थप शिक्षक तथा विद्यालय कर्मचारीहरू काठमाडौँ आएका हुन्,’ अध्यक्ष सुवेदीको भनाइ छ।

शिक्षक र कर्मचारी माग पुरा नहुँदासम्म नथाक्ने, नगल्ने र नभाग्ने उनको भनाइ छ।

‘आइतवार प्रहरी प्रशासनले बर्बरताको पराकाष्ठाको नाङ्गो नाच देखायो। भिजिलान्ते खटाएर ढुङ्गामुढाको वातावरण सिर्जना गरायो। त्यही निहुँमा लाठी बर्सायो। फोहरा हान्यो,’ अध्यक्ष सुवेदीले भने।

कानुन व्यवसायीहरूको छाता संस्था नेपाल बार एसोसिएसनले संविधानप्रदत्त विरोधका कार्यक्रम शान्तिपूर्ण रूपमा सञ्चालन गर्न, आन्दोलनमा बल प्रयोग नगर्न सम्बद्ध पक्षको ध्यानाकर्षण गराएको छ।

सर्वोच्च अदालतको आदेशअनुसार सामुदायिक विद्यालयका शिक्षक कर्मचारीको माग पूरा गरी पठनपाठनको वातावरण बनाउन बारको माग छ। आन्दोलनकै कारण राजधानीका सडकमा यातायातलगायत दैनिक जन-जीवन प्रभावित भएको बारका महासचिव वरिष्ठ अधिवक्ता केदार प्रसाद कोइरालाको हस्ताक्षरमा जारी विज्ञप्तिमा उल्लेख छ।

वार्ताका माध्यमबाट न्यायपूर्ण समाधानका लागि पहल गर्न संघीय संसद, नेपाल सरकार र नेपाल शिक्षक महासंघलगायत सम्बन्धित सबै सरोकारवालामा बारले अपिल गरेको छ।