रेशम चौधरी पक्राउ

काठमाडौं- नागरिक उन्मुक्ति पार्टीका संस्थापक तथा संरक्षक रेशमलाल चौधरी पक्राउ परेका छन्।

बुधबार काठमाडौँस्थित नेपाल प्रज्ञा प्रतिष्ठानबाट पक्राउ परेका हुन्। उनलाई सादा पोसाकमा गएका प्रहरीले उनलाई नियन्त्रणमा लिएका थिए।

जिल्ला प्रहरी परिसर काठमाडौँले फैसला कार्यान्वयनका लागि चौधरीलाई पक्राउ गरिएको बताएको छ। जिल्ला प्रहरी परिसर काठमाडौँका प्रवक्ता अपिलराज बोहराले रेशमलाई टीकापुर घटनाकै कैद भुक्तान बाँकी रहेकाले अदालतको आदेशअनुसार पक्राउ गरेको  बताए।

चौधरीलाई काठमाडौँ प्रहरी परिसरको टोलीले नेपाल प्रज्ञा प्रतिष्ठानको परिसरबाटै पक्राउ गरेको हो।

कैलालीको टीकापुरमा २०७२ भदौ ७ गते ८ सुरक्षाकर्मी र एक बालकको ज्यान लिने गरी भएको हत्याकाण्डका मुख्य दोषी चौधरी ठहर भएका थिए। रेशम चौधरीलाई जिल्लादेखि सर्वोच्च अदालतसम्मैले जन्मकैद सजाय तोकेका छन्।

तर राष्ट्रपतिबाट कैद मिनाहा पाएर २०८० जेठ १५ गते उनी जेलमुक्त भएका थिए। सरकारको सिफारिसमा राष्ट्रपति रामचन्द्र पौडेलले गणतन्त्र दिवसको दिन चौधरीलाई बाँकी कैद मिनाहा गरिदिएका थिए।

राष्ट्रपतिको सोही निर्णयविरुद्ध टीकादुर घटनामा मृत्यु भएका सशस्त्र प्रहरी निरीक्षक केशव बोहोराकी श्रीमती शारदा कडायतले सर्वोच्चमा रिट दर्ता गराएकी थिइन्।

चौधरीसँग मिल्दोजुल्दो प्रकृतिको मुद्दा रिगल भनिने योगराज ढकालको पनि थियो। राष्ट्रपतिबाट कैद मिनाहा पाएका रिगलको मुद्दामा सर्वोच्च अदालतले जन्मकैदको सजायमा मिनाहा नपाइने भन्दै स्वेच्छाचारी निर्णय नगर्न सरकारका नाममा आदेश जारी गरेको थियो। सोही नजिरलाई देखाएर रेशमलाई पक्राउ गरिएको हो।

प्रज्ञा प्रतिष्ठानमा नागरिक उन्मुक्ति पार्टी र जनमत पार्टीबीच एकताको तयारी भइरहेका वेला चौधरी पक्राउ परेका हुन्। एकता घोषणाका लागि हुने भनिएको कार्यक्रम पनि अनिश्चित बनेको छ।

कार्यक्रम गर्ने भनिएको सभा हलको ढोका पनि खोलिएको छैन। जनमतका अध्यक्ष सीके राउत र उन्मुक्तिकी अध्यक्ष रञ्जिता चौधरी पनि कार्यक्रमस्थल पुगेका छैनन्।