बङ्गालको खाडीबाट जलवाष्पयुक्त हावा भित्रियो, आंशिक बदली हुने अनुमान

काठमाडौँ- पश्चिमी तथा स्थानीय वायुको प्रभाव रहेको र बङ्गालको खाडी तथा अरब सागरबाट जलवाष्पयुक्त हावा समेत भित्रिइरहेकाले देशमा आंशिक बदली हुने मौसम पूर्वानुमान महाशाखाले अनुमान गरेको छ। मंगलवार दिउँसो देशभर आंशिकदेखि साधारणतया बदली रहने महाशाखाले जनाएको छ।

देशका पहाडी भागका केही स्थान तथा बाँकी भागका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। देशका हिमाली भू–भागका केही स्थानमा हल्का वर्षा र हिमपातको सम्भावना छ।

त्यसैगरी मंगलवार राति कोशी, गण्डकी र सुदूरपश्चिम प्रदेशलगायत देशको पहाडी भू–भागमा आंशिकदेखि साधारणतया बदली रही बाँकी भू–भागमा मौसम सफादेखि आंशिक बदली रहने छ।

कोशी, गण्डकी र सुदूरपश्चिम प्रदेशका केही स्थान तथा बाँकी प्रदेशका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। देशको हिमाली भू–भागका एक–दुई स्थानमा हल्का वर्षा र हिमपातको सम्भावना रहेको महाशाखाले जनाएको छ।