भासिएको गाडी खोज्न गएका भूगर्भविद् नै डराए

मकवानपुर- हेटौँडा उपमहानगरपालिका-१७, गैरीगाउँमा शुक्रबार जमिनमा भासिएर हराएको बोलेरो गाडी खोज्न गएको भूगर्भविद्को टोली गाडीको अवस्थितिका बारेमा पत्ता नै नलगाई फर्किएको छ। गाडी भासिएको भनिएको क्षेत्र वरपरको स्थान पनि भासिन थालेपछि भूगर्भविद्को टोली कुनै निष्कर्ष निकाल्न नसकेर फर्किएको हो।

गत शुक्रवार दिउँसो गैरीगाउँबाट स्थानीय चुच्चेखोलातर्फ आउँदै गरेको ना ४ च ४८३३ नम्बरको माछा बोक्न प्रयोग भएको बोलेरो गाडी अचानक जमिनमा भासिएपछि बेपत्ता भएको थियो। भासिएको सातासम्म पनि गाडीको अवस्था पत्ता लाग्न सकेको छैन।

जमिन भासिने समस्या थपिँदै गएपछि भूगर्भविद्को टोली बुधबार दिउँसो काठमाडौँ फर्किएको जिल्ला प्रहरी कार्यालय मकवानपुरका प्रहरी नायब उपरीक्षक श्यामु अर्यालले जानकारी दिए। भूगर्भविद् नारायण अधिकारीसहितको टोली आफूहरू नै असुरक्षित भएको भन्दै फर्किएको हो।

भूगर्भविद् अधिकारीले प्रारम्भिक अध्ययन भएको र गाडी कति तल र कहाँ छ भन्ने यकिन गर्न नसकिएको जानकारी दिएका छन्। पहिलो चरणमा पाइएका तथ्य विश्लेषण गरेर दोस्रो चरणमा काम कार्य हुने टोलीको भनाइ छ।