८ वर्षसम्म कीर्ते कारखाना चलाएका हातमा हतकडी [तस्बिरसमेत]

काठमाडौँ- कीर्ते गरी नक्कली शैक्षिक प्रमाणपत्रदेखि लालपूर्जासमेतका कागजात बनाउने तीन जनालाई नेपाल प्रहरीले पक्राउ गरी सार्वजनिक गरेको छ।

बिहीवार काठमाडौँ उपत्यका अपराध अनुसन्धान कार्यालयले बिहीबार पत्रकार सम्मेलन गर्दै उनीहरूलाई सार्वजनिक गरेको हो। उनीहरूलाई काठमाडौँ तारकेश्वर-७ फुटुङ्बाट पक्राउ गरी सार्वजनिक गरेको हो।

उनीहरूले विभिन्न सरकारी कार्यालय, स्थानीय तह, बैंक तथा वित्तीय संस्था, शैक्षिक प्रमाणपत्रलगायतका कागजात कीर्ते गरेको प्रहरीको आरोप छ।

पक्राउ पर्नेमा गोरखा मसेल घर भई हाल तारकेश्वर देवीचोक बस्ने अन्जनी बयलकोटी, ओखलढुङ्गा घर भइ बुढानीलकण्ठ बस्ने निर्मल खड्का र मकवानपुर घर भइ चन्द्रागिरी दहचोक बस्ने अन्जु खत्री रहेका छन्।

पक्राउ परेका अन्जनी बयलकोटीले विगत ८ वर्षदेखि सरकारी तथा गैरसरकारी कार्यालयका कागजात कीर्ते गरी प्रयोग तथा प्रचलनमा ल्याउने गरेको पाइएको कार्यालयका सूचना अधिकारी प्रहरी उपरीक्षक काजीकुमार आचार्यले जानकारी दिए।

फुटुङमा कोठा भाडामा लिई नक्कली कागजात बनाउन दुई जना सहयोगीलाई मासिक १० हजारदेखि रु १५ हजारसम्म तलब दिई कार्यालय संचालन गरेको उनले बताए।

बैंकबाट ऋण लिने प्रयोजनार्थ नक्कली जग्गाधनी पुर्जा बनाइदिने गरेको कुरा अनुसन्धानबाट खुल्न आएको प्रहरीले जनाएको छ।

उनीहरुबाट प्रहरीले विभिन्न सरकारी, गैरसरकारी, संघ संस्था तथा पार्टीहरुको छाप तथा व्याक्तिगत दस्तखतलगायतका ३५५ थान स्ट्याम्प र ठूलो संख्यामा नक्कली शैक्षिक, सवारी चालक अनुमतिपत्र, जग्गाधनी प्रमाणपत्र, विवाह दर्ता प्रणाणपत्र समेत बरामद गरेको छ।