ग्यास लिक भएर आगलागी, दाजुबहिनीको मृत्यु

कपिलवस्तु- शुद्धोधन गाउँपालिका–५, जयनगरमा आइतबार बिहान ग्यास चुहावटका कारण भएको आगलागीमा परेर दाजु–बहिनीको ज्यान गएको छ।

जिल्ला प्रहरी कार्यालय कपिलवस्तुका प्रवक्ता एवं डिएसपी मोहनमणि अधिकारीका अनुसार बिहान ७ बजे खाना पकाउने क्रममा ग्यास चुल्होको रेगुलेटरबाट ग्यास लिक भएर आगलागी हुँदा २५ वर्षीय शिवकुमार यादव र १८ वर्षीया बहिनी सोनम यादव गम्भीर घाइते भएका थिए।

घाइते दुवै जनाको शरीरको अधिकांश भाग जलेको थियो। शिवकुमारको शरीरको ८५ प्रतिशत र सोनमको ७५ प्रतिशत भाग जलेको अवस्थामा भैरहवास्थित मेडिकल कलेजमा प्रारम्भिक उपचार गरिएको थियो। त्यहाँ उपचार सम्भव नभएपछि थप उपचारका लागि भारतको गोरखपुरस्थित मेडिकल कलेज लैजाँदै गर्दा साँझ ६ बजेतिर बाटोमै दुवैको मृत्यु भएको प्रहरीले जनाएको छ।

मृतक सोनम राष्ट्रिय उच्च माध्यामिक विद्यालय मुडफुटुवामा कक्षा १० मा अध्ययनरत थिइन्। उनको असामयिक निधनप्रति दुःख व्यक्त गर्दै विद्यालयले सोमबार शोक बिदा दिएको विद्यालयका प्रधानाध्यापक लालचन्द पाण्डेले जानकारी दिएका छन्।