सार्वजनिक संस्थानले तिरे १४ अर्ब ३८ करोड आयकर, ३० हजारलाई रोजगारी

काठमाडौं- गत आर्थिक वर्षको मुनाफबाट सार्वजनिक संस्थाले सरकारलाई १४ अर्ब ३८ करोड रुपैयाँ आयकर दाखिला गरेका छन्। आर्थिक वर्ष २०७७/७८ को तुलनामा संस्थाले बुझाउने आयकर २.९६ प्रतिशतले घटेको छ।

सबैभन्दा धेरै आयकर जनोपयोगी क्षेत्रका सार्वजनिक संस्थानहरुले तिरेका छन्। यो वर्गका संस्थानले ६ अर्ब ७४ करोड अर्थात कुल आयकरको ४६.८८ प्रतिशत बुझाएका छन्। औद्योगिक क्षेत्रका सार्वजनिक संस्थानले कुल ५८ लाख मात्रै आयकर बुझाएका छन्।

सबैभन्दा बढी आयकर तिर्ने सार्वजनिक संस्थानमा नेपाल दूरसञ्चार कम्पनी रहेको छ। दूरसञ्चार कम्पनीले ४ अर्ब ६८ करोड रुपैयाँ आयकर तिरेको छ।

सबैभन्दा बढी आयकर तिर्ने दोस्रो कम्पनीको रुपमा रहेको नेपाल आयल निगम छ। निगमले १ अर्ब ९८ करोड कर दाखिला गरेको छ। यसैगरी राष्ट्रिय वाणिज्य बैंकले १ अर्ब ७९ करोड, कृषि विकास बैंकले १ खर्ब ४३ करोड र निक्षे तथा कर्जा सुरक्षण कोषले १ अर्ब २ करोड आयकर बुझाएका छन्।

नेपालको सार्वजनिक संस्थामा २९ हजार ७३६ जनाले प्रत्यक्ष रोजगारी प्राप्त गरेका छन्। सबैभन्दा धेरै जनउपयोगी क्षेत्रका संस्थानहरुमा १३ हजार १३० जना र सबैभन्दा कम व्यापारिक क्षेत्रका संस्थानमा १ हजार ३१८ जनाले प्रत्यक्ष रोजगारी प्राप्त गरेका छन्।