भारतले जित्यो भलिबल च्यालेन्ज कपको उपाधि

काठमाडौं – काजकस्तानलाई सोझो सेटमा हराउँदै भारतले काभा महिला भलिबल च्यालेन्ज कपको उपाधि जितेको छ। काठमाडौंमा यही जेठ आठ गतेबाट १४ गतेसम्म संचालन भएको च्यालेन्ज कपको फाइनलमा सहज जितसहित भारतले उपाधि कब्जा गरेको हो।

त्रिपुरेश्वरको दशरथ रंगशालास्थित राखेपको कभर्डहलमा आइतबार सम्पन्न फाइनलमा भारतले पहिलो सेट २५–१५ ले जितेको थियो। खेलभरी हाबी भएको भारतले दोस्रो सेटमा पनि २५–२२ को जित निकालेको हो। खेलमा तेस्रो सेट नै अन्तिम बन्यो। अन्तिम सेटमा भारतले २५–१८ को जित निश्चित गरेपछि उसले उपाधि जितेको हो।

समूह ए को विजेता बनेको भारतले समूह चरणमै आयोजक नेपाललाई हराएको थियो। उसले बंगलादेश र कीर्गिस्थानलाई पनि सहजै हराएर सेमीफाइनलमा स्थान बनाएको थियो। समीफाइनलमा उसले उज्वेकिस्तानलाई हरायो र फाइनलमा स्थान बनायो। फाइनलमा पनि सहज जित निकाल्दै भारत च्याम्यिन भएको हो।

प्रतियोगितामा आयोजकसमेत रहेको नेपालले भने तेस्रो स्थान हासिल गर्यो। आजै भएको तेस्रो स्थानको खेलमा उज्वेकिस्तानलाई ३(१ को सेटमा हराएर तेस्रो स्थान जितेको हो।

कुल ८ टोलीको सहभागिता रहेको प्रतियोगितामा माथि उल्लिखत टिमबाहेक माल्दिभ्स र श्रीलंकाको पनि सहभागीता रहेको थियो। यि दुवै टिम समूह बीको समूह चरणबाटै बाहिरिएका थिए।