हर्क साम्पाङको श्रमदानमा बालिकामाथि यौन दुर्व्यवहार, सामसुम पार्ने प्रयास विफल

काठमाडौँ– धरानमा १२ वर्षीया बालिकामाथि यौन दुर्व्यवहार गरेको आरोपमा ४९ वर्षीय खगेन्द्र राईलाई प्रहरीले पक्राउ गरेको छ। धरानका मेयर हर्क साम्पाङको नेतृत्वमा धरान-१६ मा भएको श्रमदानका बेला बालिकामाथि यौन दुर्व्यवहारको आरोपमा पीडितका परिवारले खगेन्द्रविरुद्ध किटानी जाहेरी दिएपछि प्रहरीले उनलाई पक्राउ गरेको हो।

किटानी जाहेरीपछि धरान–१७ पृथ्वीचोकका राईलाई पक्राउ गरिएको इलाका प्रहरी कार्यालय धरानका डीएसपी प्रकाश जबेगुले जानकारी दिए। धरान बहुभाषिक पाठशाला निर्माणको श्रमदान चलिरहेको बेला बालिकामाथि यौन दुर्व्यवहार गरेको राईमाथि आरोप छ।

पक्राउ परेका राई श्रमदाताहरूलाई खाना पकाउने काममा खटिएका थिए भने बालिका आफ्नी आमासँग श्रमदानमा आएकी थिइन्। त्यही क्रममा राईले बालिकालाई फकाएर दुर्व्यवहार गर्न खोजेको आरोप छ। घटना भएको बेला मेयर भने नभएको बताइएको छ।

पीडकलाई भगाउन सहयोग गरेको भन्दै अन्य दुई जनाविरुद्ध पनि किटानी जाहेरी परेको छ। श्रमदाता कुन्दन श्रेष्ठ र समीर तामाङविरुद्ध किटानी जाहेरी परेको प्रहरीले जनाएको छ। घटनाको दिन राईलाई पीडितकी आमाले कुटपिटसमेत गरेकी थिइन्।

त्यतिबैले पीडित परिवारका सदस्यले प्रहरीलाई बोलाउन खोजे पनि श्रेष्ठले विषय सामान्य भएको र छारीमान्छेकै इज्जत जाने भन्दै रोकेका थिए।

‘हामीले प्रहरी बोलाउन खोज्दा कुन्दन श्रेष्ठले श्रमदाता मानसिक रोगी हुन्, यस्तालाई कुटेर केही फाइदा छैन, उल्टै बच्चीको बदनाम हुन्छ। छोरी मान्छे हो, पछि बिहे नहुन पनि सक्छ, यस्तो कुरा लुकाउनु पर्छ,’ श्रेष्ठको भनाइ उद्धृत गर्दै पीडित परिवारका सदस्यले भने।

पाठशालामा क्षेत्र खोलाले कटान गरेपछि मेयर साम्पाङको नेतृत्वमा तारजाली लगाउन श्रमदान अभियान चलिरहेको छ। उपभोक्ता समिति बनाएर बिल लगिएपछि उपमेयर आइन्द्रविक्रम बेघाले रकम निकासा रोक्दा यहाँको श्रमदान विवादमा समेत परेको थियो। यही विषयले मेयर–उपमेयरको विवाद बढेपछि धरानले नयाँ आर्थिक वर्षको लागि बजेट समेत ल्याउन सकेको छैन।

बालिकामाथि यौन दुर्व्यवहारको विषय सामसुम बनाइएको भएपनि धरान-१६ मा प्रहरी चौकी भवन निर्माणमा अवरोध भएपछि घटना बाहिरिएको हो।

प्रदेश सरकारको लगानीमा धरान-१६ बहुभाषिक पाठशालासँगै निर्माण भइरहेको प्रहरी चौकी भवनको निर्माण रोक्न मेयर साम्पाङले कोशी प्रदेश सरकार भौतिक योजना मन्त्रालयमा पत्राचार गरेका थिए।

उनका समर्थकहरूले निर्माणस्थलमा ताला लगाए। प्रहरी चौकीको भवन निर्माण रोक्न मेयर साम्पाङ र उनका समर्थकहरूले अवरोध गरेपछि स्थानीयले श्रमदाताका नाममा आफूहरूले अन्याय सहनु परेको बताएका थिए। सोही क्रममा यौन दुर्व्यवहार भएको विषय उठेको थियो।

यता मेयर साम्पाङले दुई महिना पुरानो घटनालाई अहिले बाहिर ल्याएर श्रमदानलाई बदनाम गर्न खोजिएको आरोप लगाएका छन्।

गत शुक्रबार यो घटना बाहिर आएसँगै साम्पाङले फेसबुकमा स्टाटस लेख्दै घटना प्रमाणित भए आफूले कारबाही गर्ने बताएका थिए। साथै, उनले चेतावनी दिँदै भनेका थिए, ‘यदि यस्तो होइन रहेछ भने आरोप लगाउनेले माफी मागेर कसले यस्तो भन्न लगाएको हो बाहिर ल्याइदिनुपर्छ,’ साम्पाङको स्टाटस थियो।

तर यो स्टाटस विवादित भएपछि साम्पाङले हटाएका थिए। तर यस विषयमा अहिले उनी नयाँ प्रष्टीकरण दिइरहेका छन्। बिहिवार मात्र फेसबुक लाइभमा आएर उनले यस सम्वन्धमा आफ्नो भनाइ राखेका थिए।

यौन दुर्व्यवहार जस्तो अपराधमा मेयर आफैँले सुनुवाइ गर्ने भनेर दबाब दिएपछि न्यायका लागि प्रहरी गुहारेको पीडितका परिवारको भनाइ छ। धरान १६ का वडाअध्यक्ष मुरारी भट्टराईले मेयरले आफ्नो अधिकार क्षेत्रभन्दा बाहिर गएर कारबाहीको चेतावनी दिएको बताए।