हास्यव्यंग्य निबन्धकार भैरव अर्यालका छोराले सम्हाले त्रिवि उपकुलपतिको कार्यभार

काठमाडौँ- त्रिभुवन विश्वविद्यालयका नवनियुक्त उपकुलपति प्राडा दीपक अर्यालले कार्यभार सम्हालेका छन्। प्रधानमन्त्री एवं कुलपति केपी शर्मा ओलीबाट सपथ लिएलगत्तै कीर्तिपुरस्थित उपकुलपतिको कार्यालय पुगेर उनले कार्यभार सम्हालेका हुन्।

सहकुलपति एवं शिक्षा, विज्ञान तथा प्रविधिमन्त्री रघुजी पन्तको अध्यक्षतमा गठित सिफारिस समितिले उपकुलपतिका लागि अर्यालसहित खड्ग केसी र प्राडा विनिल अर्यालको नाम सिफारिस गरेको थियो।

चैत १५ गते त्रिवि उपकुपतिबाट प्राडा केशरजंग बरालले राजीनामा दिएपछि पद रिक्त बनेको थियो।

२०५२ सालमा शिक्षण सहायकबाट त्रिविमा प्रवेश गरेका अर्याल ३० वर्षपछि २०८२ मा त्रिविकै उपकुलपति बनेका हुन्।

२०५४ सालमा उपप्राध्यापक भएका अर्याल २०७६ सालमा प्राध्यापक बने।

सन् २०१६ देखि २०२४ सम्म उनले जल तथा मौसम विज्ञान केन्द्रीय विभागको विभागीय प्रमुखको जिम्मेवारी सम्हाले। अर्याल नेपाल विज्ञान तथा प्रविधि प्रज्ञा प्रतिष्ठानका प्राज्ञ पनि हुन्।

सन् १९९७ मा त्रिभुवन विश्वविद्यालयबाट मौसम विज्ञानमा स्नातकोत्तर तहमा प्रथम श्रेणीमा प्रथम स्थान हासिल गरेर तत्कालीन राजाबाट महेन्द्र विद्या भूषण ‘ख’ पदक प्राप्त गरेका थिए।

जापान सरकारको प्रतिष्ठित मोन्बुशो छात्रवृत्ति अन्तर्गत सन् २००० मा जापानको नागोया विश्वविद्यालयबाट पनि वायुमण्डलीय विज्ञानमा स्नातकोत्तर गरे। पछि उनले त्रिभुवन विश्वविद्यालयबाटै सन् २०१६ मा मौसम विज्ञानमा विद्यावारिधि उपाधि हासिल गरेर राष्ट्रपतिबाट नेपाल विद्या भूषण ‘क’ पदकद्वारा सम्मानित भए।

अर्याल चरम मौसमी घटना, वायुप्रदूषणको गतिशीलता र पर्वतीय क्षेत्रको मौसम प्रणालीका विशेषज्ञ हुन्। उनी नेशनल जियोग्राफिक सोसाइटी, रोलेक्स र त्रिभुवन विश्वविद्यालयको संयुक्त पहलमा सगरमाथा क्षेत्रमा विश्वकै सबैभन्दा अग्लो स्थान (८८०० मिटरसम्म) मा स्वचालित मौसम केन्द्रहरूको सञ्जाल स्थापना गर्ने टोलीका प्रमुख सदस्य रहेका थिए।

उपकुलपतिमा प्राडा अर्याल हास्यव्यंग्य निबन्धकार स्व. भैरव अर्यालका जेठा छोरा हुन्। भैरव अर्याल हास्यव्यंग्य निबन्धको क्षेत्रमा सुपरिचित नाम हो।