नेकपा एसमा वरिष्ठ नेता बने वामदेव

काठमाडौँ- माधवकुमार नेपाल नेतृत्वको नेकपा (एकीकृत समाजवादी) र वामदेव गौतम नेतृत्वको नेकपा राष्ट्रिय एकता अभियानबीच पार्टी एकता घोषणा भएको छ। शुक्रबार राष्ट्रिय सभागृहमा आयोजित कार्यक्रममा दुई पार्टीबीच एकताको घोषणा भएको हो।

गौतमलाई वरिष्ठ नेता बनाएर नेकपा एसले भित्र्याएको हो। नेपाल र गौतमबीच शुक्रबार पार्टी एकता गर्ने सहमतिपत्रमा हस्ताक्षर भएको थियो।

एकीकृत समाजवादीमा गौतमलाई वरिष्ठ नेताको जिम्मेवारी दिने त्यतिबेलै सहमति भएको थियो। सोहीअनुसार आज सभागृहमा एकता घोषणासभा भएको हो। गौतमलाई नेकपा एसको तेस्रो वरीयता दिइएको छ।

एमालेले वेवस्ता गरेपछि नेता गौतम नेकपा एससँग एकता गर्न पुगेका हुन्।

नेपालले ४ वर्ष प्रयास गरेर गौतमलाई पार्टीमा भित्र्याएका हुन्। यसअघि पनि पटकपटक गौतमलाई भित्र्याउने प्रयास भएपनि गौतमको ढुलमुले प्रवृत्तिका कारण सफल भएको थिएन। नेकपा एसमा प्रवेश गर्ने टुंगो गर्ने बित्तिकै एमाले अध्यक्ष केपी शर्मा ओलीसँग भेट गर्न गएर आफू एमालेमा पस्न ठिक्क परेको बताउने गरेका थिए। यसपालि भने गौतम नेकपा एसमा पस्ने हल्ला चले पनि ओलीले कुनै वास्ता गरेनन्। पूर्वराष्ट्रपति विद्यादेवी भण्डारी एमालेको सक्रिय राजनीतिमा फर्किएको घोषणा गरेपछि ओलीको ध्यान वामदेवतर्फ केन्द्रित हुन सकेन।

शुक्रबार एकता घोषणा कार्यक्रममा बोल्दै गौतमले चार वर्षदेखि प्रयास सफल भएकामा अत्यन्त खुसी लागेको बताए। ’अलि अलि पनि होइन। ज्यादै धेरै व्यक्त गर्न सक्दिनँ,’ उनले भने।

उनले एकीकृत समाजवादीको कार्यालय र आफ्नो पार्टीको कार्यालयबाट धेरै टाढा नभए पनि त्यहाँ पुग्न चार वर्ष लागेको बताए।

‘मेरो पार्टी अफिस सैँबु आवास क्षेत्रमा छ। धेरै टाढा होइन। त्यहाँबाट एकीकृत समाजवादीको कार्यालयसम्म आइपुग्न चार वर्ष लाग्यो। चार वर्षपछि मैले भनेजसरी हामी एकीकृत हुँदैछौँ,’ उनले भने।

नेता गौतमले आफू एक्लै नभएर नेकपा एकता राष्ट्रिय अभियानको ७५ सदस्यीय केन्द्रीय कमिटीको समर्थन बोकेर आएको समेत बताएका छन्।

‘म एक्लै आएको छैन आज। एक्लै आउँदा कहिले पनि सफल भइनँ। त्यसो भएर आज म नेकपा एकता राष्ट्रिय अभियानको ७५ सदस्यीय केन्द्रीय कमिटीको समर्थन बोकेर आएको छु,’ उनले भने।