नाउपामा अन्योल,रञ्जिताले बुझाइनन् स्पष्टीकरण

काठमाडौँ– नागरिक उन्मुक्ति पार्टी (नाउपा) अध्यक्ष रञ्जिता श्रेष्ठले पार्टीले सोधेको स्पष्टीकरण जवाफ फर्काएकी छैनन्।

गत आइतबार बसेको केन्द्रीय समितिको बैठकले श्रेष्ठलाई २४ घण्टाभित्र जवाफ दिने गरी स्पष्टीकरण सोध्ने निर्णय गरेको थियो।

पार्टी अध्यक्ष श्रेष्ठले स्वास्थ्यको कारण देखाएर साउन ११ गते कार्यवाहक अध्यक्षको जिम्मेवारी वरिष्ठ उपाध्यक्ष रहेका शिव बास्तोलालाई सुम्पेकी थिइन्।

‘मेरो स्वास्थ्य अवस्थाका कारण पार्टीको दैनिक कार्य सञ्चालन र महतपूर्ण निर्णय प्रक्रियामा मेरो भौतिक उपस्थिति सम्भव नदेखिएकोले पार्टीको कार्यप्रवाहमा कुनै अवरोध नआओस् भन्ने उद्देश्यले यो निर्णय गरिएको छ,’ कार्यवाहक तोकेको पत्रमा रञ्जिताले लेखेकी थिएन्।

उनले गरेको निर्णयले पार्टीभित्र विवाद उत्पन्न भएकको छ। श्रेष्ठलाई स्पष्टीकरणको लागि उपलब्ध गराइएको समयावधि मंगलबार नै सकिएको छ। तोकिएको अवधिभित्र श्रेष्ठले स्पष्टीकरण नबुझाएको अनुशासन समितिले जनाएको छ।

पार्टीभित्र विवादित बनेकी श्रेष्ठबारे आवश्यक निर्णय लिन नाउपाको राष्ट्रिय भेला बुधबारका लागि बोलाएको छ। श्रेष्ठलाई कारबाहीका लागि अनुशासन समितिले गरेको निर्णयलाई राष्ट्रिय भेलाले अनुमोदन गर्ने भएको छ।

पूर्वमन्त्री राजकुमार गुप्ता तानिएको घुस काण्डमा श्रेष्ठलाई पनि अख्तियार दुरुपयोग अनुसन्धान आयोगले तानेको छ।
पोखरामा भएको जग्गाको डिल प्रकरण, मालपोतका हाकिमलगायतको विषयमा गुप्तासँगै श्रेष्ठ पनि तानिएकी हुन्।

बिचौलियासँग घुस डिल गरेको अडिओमा रञ्जिताको पनि संलग्नता भेटेपछि अख्तियारले उनलाई गत बुधबार बयानको लागि समेत बोलाएको थियो।

त्यसपछि पार्टीका केन्द्रीय समितिको बैठकले श्रेष्ठलाई स्पष्टीकरण सोध्ने निर्णय गरेको थियो।