एसियन विकास बैंक र विश्व बैंकबीच ३ अर्ब डलर सम्झौता, ऋण क्षमता विस्तारमा सहयोग

मनिला,सिन्ह्वा। एसियन विकास बैंक (एडीबी) ले एशिया–प्रशान्त क्षेत्रका विकासशील मुलुकहरूलाई थप आर्थिक सहायता दिनसक्ने गरी विश्व बैंक३ अर्ब अमेरिकी डलर बराबरको जोखिम साटफेर सम्झौता गरेको छ।

एडीबीका अनुसार, यो सम्झौता विश्व बैंकसँगको पहिलो हो, तर अन्य बहुपक्षीय विकास बैंकहरूसँगको छैटौं सम्झौता हो। सन् २०२० यता गरिएका यस्ता सम्झौताहरूको कुल रकम नौ अर्ब डलर पुगेको छ।

एडीबीकी वित्त तथा जोखिम व्यवस्थापन उपाध्यक्ष रोबर्टा कासालीले भने,“आजका जटिल चुनौतीहरूमाझ बहुपक्षीय बैंकहरुबीच सहकार्य अत्यावश्यक छ। यस्ता सम्झौताले हामीलाई जोखिम सन्तुलनमा राख्दै, अझ धेरै देशसम्म सहायता पुर्‍याउने अवसर दिन्छ।”

विश्व बैंक समूहकी प्रमुख वित्त अधिकृत अंशुला कान्तका अनुसार, यो सम्झौताले बहुपक्षीय बैंकहरूबीच सहकार्य गर्दै कुल ऋण क्षमतामा विस्तार ल्याउने उद्देश्य राखेको छ।

सार्वभौमिक जोखिम साटफेर भनेको यस्तो प्रणाली हो, जसले बैंकको जोखिम धेरै एउटै मुलुक वा क्षेत्रमा केन्द्रित नहोस् भनेर सन्तुलन कायम गर्छ । यसले पूँजीको प्रयोग कम गरी, थप ऋण दिन सक्ने क्षमता बढाउँछ।

यस किसिमको रणनीतिक सहकार्यले एशिया–प्रशान्त क्षेत्रका विकासशील मुलुकहरूलाई आवश्यक परेको आर्थिक सहायता सजिलो र सुलभ बनाउनेछ।