फोर्ड मोटर फर्कियो भारत, नेक्स्ट जेनेरेस इन्जिन उत्पादनमा साढे ३२ अर्ब लगानी गर्ने

एजेन्सी। अमेरिकाको फोर्ड मोटर कम्पनी भारतको तमिलनाडुमा बन्द भएको कारखानामा पुनः सञ्चालनमा ल्याउने भएको छ। पूर्ण रूपमा अर्को पुस्ताका (नेक्स्ट जेनेरेसन) इन्जिन उत्पादन गर्न फोर्डले ३२ अर्ब ५० करोड भारु लगानी गर्न सहमत भएको छ।

फोर्डले तीन वर्षपछि उत्पादन सञ्चालन नवीकरण गर्ने लामो योजनालाई पुनर्जीवित गरेको छ। चेन्नई नजिकै रहेको मराईमलाई नगर प्लान्टबाट फोर्डले आउँदो सन् २०२९ देखि गाडी उत्पादन सुरु गर्ने लक्ष्य राखेको छ। जसको वार्षिक क्षमता दुई लाख ३५ हजार इन्जिन हुनेछन्। यसले धेरै अप्रत्यक्षका साथै ६०० भन्दा बढी प्रत्यक्ष रोजगारी सिर्जना गर्नेछ।

गत मार्च १८ मा फोर्डले चेन्नईबाट इन्जिन र सम्बन्धित कम्पोनेन्टहरू उत्पादन र निर्यात गर्न खोजिरहेको जानकारी दिएको थियो।
पछि, अक्टोबर ११ मा फोर्डका शीर्ष कार्यकारीहरूले प्लान्टको भविष्यको बारेमा छलफल गर्न तमिलनाडु सरकारका अधिकारीहरूलाई भेट्ने अपेक्षा गरेको जानकारी दिएका थिए।

फोर्ड मोटर कम्पनीका प्रतिनिधिहरूले दिनको सुरुमा तमिलनाडुका मुख्यमन्त्री एमके स्टालिनलाई भेटेर सेप्टेम्बर २०२४ मा कम्पनीले पेश गरेको आशय पत्रको आधारमा इन्जिन उत्पादन योजनाहरू पुष्टि गरेका थिए।

बढ्दो घाटा, गाडी बिक्रीमा गिरावट र विश्वव्यापी पुनर्संरचनाकाबीच फोर्डले सेप्टेम्बर २०२१ मा भारतमा रहेको आफ्नो कारखाना बन्द गरेको थियो। सन्२०२२ मा कम्पनीले गुजरातको सानन्दमा रहेको आफ्नो कार निर्माण कारखाना टाटा मोटर्सलाई बेचेको थियो।

यद्यपि, यसले यस क्षेत्रमा इन्जिन उत्पादन सुविधा कायम राखेको थियो। फोर्डले चेन्नई प्लान्ट बेच्न अन्य अटोमेकरहरूसँग पनि वार्ता गरिरहेको थियो। तर, पछि योजनालाई स्थगितको निर्णय गरेको थियो।

१९९५ देखि भारतमा आफ्नो तीन दशक लामो कार्यकालमा, कम्पनीले २ अर्ब डलरभन्दा बढी लगानी गरेको थियो। इकोस्पोर्ट एसयूभी र फिगो सानो कारसहित सफल मोडेलहरू उत्पादन थालेर राम्रो बजार हिस्सा ओगटेको थियो।

पछिल्लो उत्पादन योजनाहरूले सानन्दमा रहेको इन्जिन उत्पादन प्लान्टलाई पूरक बनाउँछ, जसले इन्जिन उत्पादन र निर्यात गर्दछ। भारत यस क्षेत्रमा कम्पनीको सञ्चालनको लागि महत्वपूर्ण रहने बताइएको छ।

‘हामी हाम्रा योजनाहरूलाई अगाडि बढाउन र फोर्डको उत्पादन सञ्जालमा चेन्नई प्लान्टको महत्वपूर्ण भूमिका पुष्टि गर्न पाउँदा खुसी छौं’ फोर्डका अन्तर्राष्ट्रिय बजार समूहका अध्यक्ष जेफ मारेन्टिकले एक विज्ञप्तिमा भने ‘योजनाहरूलाई अगाडि बढाउन हामी तमिलनाडु सरकारको निरन्तर सहयोगको लागि आभारी छौं। यो निर्णयले भविष्यका उत्पादनहरूको लागि भारतको उत्पादन क्षमताको लाभ उठाउने हाम्रो प्रतिबद्धतालाई सुदृढ बनाउँछ।’

फोर्डले इन्जिनको प्रकार र निर्यात बजारको बारेमा विवरण उत्पादन सुरु हुने बित्तिकै सार्वजनिक गर्ने भनेको छ।

बलियो उपस्थिति

कार निर्माण कार्यबाट बाहिरिए पनि फोर्डले तमिलनाडुमा रहेको आफ्नो विश्वव्यापी व्यापार सञ्चालनमार्फत भारतमा बलियो उपस्थिति कायम राख्यो। लगभग १२ हजार मानिसहरूलाई रोजगारी दिन्छ।

भारतमा फोर्डको लगानी यस्तो समयमा आएको छ जब अमेरिकी राष्ट्रपति डोनाल्ड ट्रम्पले अमेरिकी र विदेशी कम्पनीहरूलाई उत्पादन र रोजगारी देशमै फिर्ता सार्न दबाब दिइरहेका छन्। विदेशमा उत्पादन गर्नेहरूको सार्वजनिक रूपमा आलोचना गरिरहेका छन्।।

चेन्नईमा उत्पादन सुरु गर्ने फोर्डको निर्णयले तमिलनाडुको पुनरुत्थान भएको अटोमोटिभ क्षेत्रलाई थप ऊर्जा दिने तमिलनाडुका उद्योगमन्त्री टीआरबी राजाले भनेका छन्।

‘यो केवल अवस्थित फोर्ड सुविधामा उत्पादनको सुरुवात मात्र होइन, यो राज्यले अर्को पुस्ताको इन्जिनको उत्पादनको साथ अटोमोटिभ उद्योगको भविष्यतर्फ अर्को कदम चालेको छ। हामी यहाँ फोर्डको सञ्चालनलाई समर्थन गर्न प्रतिबद्ध छौं’ उनले भनेका छन्।

(द इकोनोमिक टाइम्सको सहयोगमा)